Más empreses incorporen l'idioma na so actividá

Nordés Móvil, compañía de telefonía móvil nueva, usa l'asturianu con normalidá.

Cada vegada más empreses incorporen l'idioma na so actividá y campañes publicitaries. La última ye Nordés Móvil, un operador móvil virtual con sede n'Avilés.

"Dendes Nordés Móvil creyemos que son tiempos p'apostar pol consumu llocal y el sofitu a empreses y emprendimientu que dende Asturies quieren dar serviciu a la ciudadanía. Por ello, entamamos esti nuevu proyectu dende una perspectiva d'ufrir un serviciu de telefonía móvil dende una perspectiva llocal y asturiana, que revierta los beneficios na propia tierra. Creyemos nel consumu llariegu como la meyor manera d'afrontar el futuru prósimu na situación na que tamos, yá que sofitando empreses ya iniciatives asturianos construyimos un futuru meyor pa la nuestra sociedá", preséntase.

El compromisu pa cola cultura de país lleva a emplegar con normalidá la llingua asturiana xunto col castellanu. Asina, amás del usu na publicidá y marketing, el tratu colos veceros tamién va ser nel idioma llariegu.

Como promoción nestos primeros pasos, Nordés Móvil ufre trés tarifes de nome Galana, Asturcón y Urriellu dende los 12,95 euros con llamaes ensin tope y 14 'gigabytes'.