La XDLA pide a Barbón que la ultraderecha de VOX nun-y “marque’l pasu en política llingüística”

La entrega a VOX d’una torna en castellanu de les so pallabres n’asturianu y gallego-asturiano nel discursu del alderique d’orientación política y lo asocedío en Siero lleva a la Xunta pola Defensa de la Llingua Asturiana (XDLA) a pidir a Adrián Barbón que la ultraderecha nun-y “marque’l pasu en política llingüística”. Afala-y a “actuar y encarar la reforma estatutaria pa incluyir la oficialidá”.

“Non sólo los conceyales de Siero nun puen usar llibremente l'asturianu. Ye que nin siquiera’l presidente d’Asturies pue facelo nos debates na Xunta Xeneral: una minoría d'estrema derecha nun-y dexa. Namás-y dexen, o perdónen-y, que pueda lleer y namás lleer si primero-yos apurren la versión en castellanu”, critica la XDLA, que recuerda que “la ultraderecha pue quitar de qu’Adrián Barbón o cualquier otru cargu electu pueda falar n’asturianu porque hasta que l’asturianu nun se reconoza como llingua oficial los derechos llingüísticos de los sos falantes nun esisten. Son namás concesiones al debalu y al caprichu de cualquier reaccionariu”.

Por esti motivu, la organización cívica reclama a Barbón “que nun s'escuenda detrás del virus. Ye tiempu de reconocer derechos. Ye tiempu d’acabar con imposiciones antidemocrátiques” “¿Pue sobrevivir una llingua si nin siquiera’l presidente pue usala llibremente? ¿Pue siquiera protexese y promocionase una llingua que ta na práctica prohibida?”, entrúgase.

“Nun ye'l momentu d'esperar y mirar pa otru llau. Ye'l momentu d'actuar y encarar la reforma estatutaria pa incluyir la oficialidá”, fina la XDLA, que llamenta tamién la situación vivida en Corvera, onde’l PSOE nun sofitó una moción d’esti coleutivu pa qu’encamentar a la Xunta Xeneral que reconoza l'asturianu y el gallegu-asturiano como llingües oficiales. Ésta aprobóse colos votos de Podemos y IX, cola astención de los socialistes col argumentu, defendíu tamién por Barbón, de que la reforma del Estatutu nun ye urxente al ser la prioridá la llucha contra la COVID-19.

Na imaxe, Barbón mira un llibru que-y regaló'l voceru de VOX, Ignacio Blanco, nun aconceyamientu celebráu ayeri en Presidencia. Semeya obra d'Armando Álvarez.