Tornen a aumentar los contaxos: 333 esti martes

La tasa de positividá asitióse en 8,4 por cientu nuna xornada na que finaron 5 persones.

Tres trés xornaes con descensu nel númberu de casos nuevos, ayeri se rexistraron 333 contaxos, que nos datos oficiales son 336 por 3 casos diagnosticaos en díes anteriores. Son 92 positivos más que'l llunes.

Fixéronse 3.960 pruebes PCR nes 24 hores últimes, polo que la tasa de positividá ye del 8,4 por cientu, tamién superior a l'anterior, que foi un 6,44 por cientu. Sigue superándose asina'l 5 por cientu que marca la Organización Mundial de la Salú como llende pa tener controlada la pandemia.

Segun la comunicación de la Conseyería de Salú, hebo 72 ingresos por coronavirus SARS-CoV-2 en planta y 10 más en UCI, polo qu'hai un total de 444 pacientes COVID-19 confirmaos y sospechosos. Amás, otros 61 afeutaos tán en cuidaos intensivos.

Ayeri hai que llamentar 5 muertes, trés muyeres de 81, 78 y 76 años y dos homes de 94 y 80. Dende qu'entamó l'andanciu perdieron la vida con COVID-19 confirmáu un total de 425 persones.