El xuegu ‘¿Cuála ye?’ llega a les cases con 900 entrugues sobre Asturies

Estos díes son munchos los asturianos que tán disfrutando y deprendiendo sobre Asturies y la so cultura gracies al xuegu ‘¿Cuála ye?’, el primeru p’adultos n’asturianu, con finalmente 900 entrugues. Acuto Xuegos yá principió col repartu a los mecenes y tien a la venta un centenar d’unidaes en dellos comercios a un preciu de 42 euros.

Historia, cultura, llingua y lliteratura, ciencies y naturaleza, deportes y entretenimientu, y xeografía y conceyos son les seis temátiques de les 150 tarxetes que componen finalmente’l xuegu. En total, 900 entrugues nes qu’escoyer ente delles opciones o facer una respuesta direuta.

En total Acuto Xuegos fabricó 300 unidaes del xuegu, de los qu’al rodiu de los 200 foron pa mecenes y collaboradores. Un centenar tán a la venta pol preciu de 42 euros en Xixón (La Buena Letra), Uviéu (Llibrería Trabe), Avilés (Olmar Regalos), Mieres (Decalupa), Ribeseya ( La Jirafa), Cangues (Muniama) y Noreña (Copistería La Semeya), o contautando direutamente cola empresa.