El IV Premiu Relatos Curtios Xosé Caveda y Nava recibe testos hasta’l 30

El Conceyu de Villaviciosa convoca un añu más el Premiu Relatos Curtios Xosé Caveda y Nava. Con una dotación económica de 1.000 euros y la so carauterística Mazana de Plata conmemorativa, el plazu pa unviar creaciones fina’l día 30 del presente mes.

El llargor de los testos presentaos a concursu –ún como máximo por persona– ha tener una estensión d’ente 3 y 12 folios, d’acordies colos requisitos qu’afiten les bases del concursu. El tema ye libre y les obres han de ser orixinales y inéditas, incluyíos medios electrónicos.

Los trabayos han presentase en formatu papel, triplicaos y en sobre zarráu con plica, col día 30 como llende nel Rexistru del Ayuntamientu de Villaviciosa, o al traviés del corréu postal nestes señes: Casa Conceyu de Villaviciosa (IV Premiu de Relatos Curtios Xosé Caveda y Nava); Plaza del Ayuntamientu, 1; 33300; Villaviciosa. Un xuráu formáu por “persones de prestixu reconocíu nel ámbitu cultural y lliterariu” va encargase de decidir al ganador.

La primer edición del Xosé Caveda y Nava, nel 2017, llevóla Francisco Álvarez ‘Paco’ con ‘Mar d’Irlanda’, que repetiría l’añu pasáu con ‘El faru de Viena’. La segunda foi pa José Ángel Gayol con ‘Tolo que sé sobre toles coses’.

Na semeya, casa natal de Caveda y Nava.