Mieres tamién entra n'alerta naranxa

A los cinco conceyos nesti estáu, sumárase'l xueves Ḷḷena y la parroquia uvieína de Trubia. Na xornada hebo 117 contaxos y 3 muertes.

La Conseyería de Salú declaró esta tarde l'alerta naranxa en Mieres por COVID-19. Les autoridaes sanitaries lleguen a esta decisión pola esistencia dellos casos pel conceyu que provocaron biltos, ún d'ellos nun centru sociosanitariu, de nome Abuli, nel que se detectaron 25 persones con coronavirus SARS-CoV-2 d'un total de 30 residentes.

Tamién fai un llamamientu públicu a los veceros del chigre El Duende, en Trubia, dende'l 17 de setiembre al 8 d'ochobre; el restorán La Panoya, en Cenera, del 21 de setiembre al 8 d'ochobre; y Casa Eliseo, de L'Entregu, población de Samartín del Rei Aurelio, conceyu tamién n'alerta naranxa al igual que Llaviana, Llangréu, Xixón y Ponga, del 19 de setiembre al 8 d'ochobre, pa facer un estudiu ampliáu de contautos pola declaración de biltos de coronavirus con dellos afeutados en dichos establecimientos. Han de rellenar esti formulariu o llamar al teléfonu 984.10.04.00.

El  mesmu pasu han de dar los del Bora-Bora y Vaya Bull, en Xixón, y, dende ayeri, los de los ximnasios McFIT y el AltaFit Natahoyo, tamién en Xixón, y Quirinal 14 Sport, n'Avilés. Más de 1.200 veceros d'estos centros deportivos yá contautaron coles autoridaes sanitaries.

Tasa de positividá de 2,66 por cientu

Los datos oficiales de la COVID-19 dexaron ayeri 117 casos nuevos, 118 pola incorporación d'un positivu de díes anteriores, que ponen el total de la serie en 6.352. 6 persones tuvieron que ser hospìtalizaes, mentes que'l restu son asintómaticos o tienen síntomes leves y tán aisllaos nos sos llares.

Fixéronse 4.387 pruebes PCR, polo que la tasa de positividá asitióse nel 2,66 por cientu. Ésta sigue ensin superar el 5 por cientu que llevaría a prender les alarmes, según el criteriu de la Organización Mundial de la Salú (OMS).

Según les cifres comunicaes, na UCI hai un paciente más (24) y en planta, 4 (93). Una persona recibió l'alta epidemiolóxica, polo que'l total de curaciones queda en 2.300.

Na xornada hai que llamentar 3 muertes. Son trés homes de 71, 83 y 89 años, de los que nengún residía en centros sociosanitarios.