Asturies suma la segunda selmana con 92 casos nuevos diarios de media

Les cifres de la COVID-19 caltuvieron unes cifres asemeyaes la selmana pasada en positivos en comparanza cola anterior, con una lixera llinia ascendente. Nos siete díes últimos rexistráronse 649 casos nuevos, lo que supón, de media, 92 casos nuevos diarios.

Esta fin de selmana el númberu de positivos detectaos quedó en 330: 142 el vienres, cifra más alta rexistrada dende’l 20 de marzu, récor de la pandemia con 146; 95 el sábadu; y 93 ayeri. Na selmana última pasóse de 5.267 casos nuevos a 5.916, una media de 92 al día, al igual que l’anterior.

Les anteriores, mentes, la cantidá de contaxos medios diarios foi 39, 46, 52 y 83. La evolución sigue siendo lixeramente ascendente, al pasar de 642 a 649 casos si comparamos les dos selmanes últimes.

Si miramos les cifres oficiales últimes, correspondientes al xueves, hai 3 persones más ingresaes na UCI (20) y 19 en planta (62). Estos trés díes 3 persones recibieron l’alta epidemiolóxica, polo que’l total de recuperaciones queda en 2.289, mentes que nun se rexistraron muertes depués d’un mal entamu de selmana, con 6.

Burbuyes sociales

Les autoridaes sanitaries aconseyen la creación de burbuyes sociales y entornos saludables pa reforciar la proteición contra la COVID-19 na segunda fola de la pandemia. Estes burbuyes sociales consisten en llendar los contautos estrechos, lo que llevará a un menor riesgu de tresmisión de la enfermedá ensin necesidá de tomar midíes más restrictives.

“Les midíes rellacionaes coles burbuyes sociales son fundamentales pa llograr que caún de nós tenga un máximu de 6 contautos habituales al marxe de les persones coles que convivimos. Si nos movemos nesi círculu, tendremos muncha mayor proteición”, recomendó Pablo Ignacio Fernández Muñiz, conseyeru de Salú, na Comisión de Salú celebrada esta mañana na Xunta Xeneral.