“Esta llexislatura nun pue convertise n’otra llexislatura fallida”, alvierte nel Día de les Lletres la XDLA

“Yá tuvo bien d’aplazamientos y del ‘agora nun toca’” censuró la Xunta pola Defensa de la Llingua Asturiana (XDLA) na concentración pola oficialidá del asturianu y de gallego-asturiano celebrada nel XLI Día de les Lletres Asturianes. La organización entiende que “esta llexislatura nun pue convertise n’otra llexislatura fallida”.

La Federación Socialista Asturiana (FSA), al ser “l’únicu partíu con representación parllamentaria abondo pa entamar la reforma del Estatutu d’Autonía y porque amás ye’l partíu del Gobiernu”, foi’l principal destinatariu d’esta reclamación na intervención de María Xosé Martínez, presidenta de la XDLA, na cai Suárez de la Riva, ente la Xunta Xeneral y Presidencia. “Na llexislatura pasada pidimos-yos qu’asumiera’l mandáu del so últimu congresu y apoyara la propuesta de reforma del Estatutu que presentaren los grupos de Podemos y Izquierda Xunida. Diximos que nun yera entendible reconocer una falta de derechos y al tiempu nun poner los medios pa correxila. Llamentablemente nun tuviemos éxitu. Esta reivindicación volvió inmediatamente al caxón de les coses aplazables. Dixéronnos: será pa la otra llexislatura...”, recordó.

Agora, avanzáu’l segundu añu de llexislatura, nun ve nos socialistes aición nenguna p’abrir la reforma del Estatutu: “¿A qué tamos esperando?”, entrugóse. “Sabemos qu’hai un virus que ta faciéndonos la vida muncho más abegosa, pero nun nos tenemos qu’engañar: el virus nun ye’l culpable de que nun tengamos oficialidá nel añu 2020. Tampoco nun ye culpa de les aritmétiques parllamentaries. Que falta un votu pa los 27, dicen. Nun lo sabemos: nun sabemos si falta ún, si falten dos, si sobren o si en realidá falten toos. Hasta que nun s’abra la reforma del Estatutu, lo que realmente falta ye voluntá”, siguió Martínez.

“Señor presidente Adrián Barbón: tóca-y a usté. Esperamos que nun abandone lo que tamién usté sabe ye de xusticia. El futuru va xulgalu, o por ser quien dignificó la situación de la llingua asturiana o por ser quien la dexó morrer desprotexida y albentestate. El momentu ye agora: l’asturianu, llingua oficial ¡yá!”, finó’l discursu onde tamién se pidió a tolos partíos “un exerciciu de responsabilidá mínima: que dexen de llau los cálculos partidarios y l’enfrentamientu sectariu, y que se pongan a trabayar nuna reforma estatutaria que nun pue esperar más”.

Discursu completu

Ésta ye la intervención completa que fixo Martínez baxo la lluvia énte los asistentes qu’acudieron a la llamada añal de la XDLA pa reclamar la oficialidá nel Día de les Lletres Asturianes, modificada nesta ocasión a concentración por mor de la pandemia de COVID-19:

Bones tardes.

Munches gracies a toos y toes por participar nesti Día de les Lletres Asturianes tan raru, nun añu en que tantísimes coses tán camudando. Pidímosvos que pongáis procuru coles distancies de seguranza y que vos caltengáis a salvu d’esti andanciu que tantu mal ta faciendo.

Sicasí, con andaciu o ensin él, hai dalgo n’Asturies que nun camuda, que sigue inalteriable. La llingua asturiana y el gallego-asturianu siguen ensin ser reconocíos como llingües oficiales del pueblu que les fala. Los nuestros derechos llingüísticos siguen tando inoraos y violentaos. El nuestru patrimoniu llingüísticu sigue arrequexáu y camín de desaniciar.

Vímoslo bien claro nel confinamientu que nos metió a toos en casa trés meses llargos, cuando la nuestra música, les nuestres lletres, el nuestru teatru, la nuestra cultura se vio obligada a dexar de falar al pesllar teatros y sales de conciertos. Sicasí, foron munchos los que fixeron por qu’Asturies nun quedara callada, por facer alendar esti patrimoniu vivu y llevalu a toles cases al traviés de les redes sociales. La xente de la cultura supo tar ehí y caltener encesa la so llaparada. Por eso, güei, más que nunca, n'agradecimientu, tenemos que tener claro que la cultura ye segura.

N'otros territorios tuviéronlo más fácil, porque la so llingua ye oficial y tienen una radiotelevisión autonómica onde suena la so música, onde se puen ver series y películes nel so idioma y onde se pue saber lo que pasa en tol mundu coles palabres de casa. Equí non. Equí, pola falta d'oficialidá, too depende de la voluntá. Foi vergonzoso ver cómo a lo llargo de trés meses la nuestra cultura y la nuestra llingua quedaron confinaes gracies a una RTPA que-yos dio'l llombu. Agora, más que nunca, fai falta una RTPA comprometida cola llingua y cola cultura asturiana.

Tamién hai que s’alcordar del profesoráu d’Asturianu y Gallego-Asturianu, que depués del esfuerciu fechu col teletrabayu, al volver a les aules ven que la so situación de precariedá nun camudó.

Hai otra cosa que nun camuda n’Asturies: la voluntá del movimientu de reivindicación llingüística de siguir reclamando lo que ye de xusticia. Equí tamos, otru Día de les Lletres más, glayando ¡l’asturianu, llingua oficial!

Va namás unos díes, pidíemos responsabilidá a los partíos políticos pa sacar alantre una reforma del estatutu qu'acabe d'una vez cola marxinación llingüística. Porque esta llexislatura nun pue convertise n’otra llexislatura fallida.

Yá tuvo bien d’aplazamientos y del “agora nun toca”.

Y que nun s’escuendan en discutinios sobre modelos d’oficialidá. Nun hai un modelu d’oficialidá igual que nun hai un modelu d’igualdá. O la llingua ye oficial o nun lo ye. Desque se reconoza llegalmente’l derechu, yá se falará de modelos de política llingüística. Nun hai qu’inventar la pólvora. Yá ta inventao. Lo qu’hai que facer agora n’Asturies fíxose yá va cuatro décades nes demás comunidaes autónomes con una llingua propia diferente del castellanu: Galicia, País Vascu, Navarra, Cataluña, Valencia y Baleares.

Reclamamos a tolos grupos parllamentarios un exerciciu de responsabilidá mínima: que dexen de llau los cálculos partidarios y l’enfrentamientu sectariu, y que se pongan a trabayar nuna reforma estatutaria que nun pue esperar más. Pidimos, sobre manera al Partíu Socialista, que garre la iniciativa porque ye l’únicu partíu con representación parllamentaria abondo pa entamar esa reforma y porque amás ye’l partíu del Gobiernu.

Pidimos compromisu pa iguar un despreciu históricu que tien qu’acabar. Y ye que la desprotección que carecemos les persones que falamos asturianu rescampló más entovía esta Selmana de les Lletres Asturianes. A los güeyos de tol mundu ta representándose una función na Xunta Xeneral onde una minoría d’estrema derecha ye quien a coartar el derechu de los diputaos y diputaes a falar n’asturianu y en gallego-asturianu. ¿Pue aguantase esto? ¿Nun ye la hora de dicir que yá tuvo bien?

Hailu qu’hasta propón conciliar los derechos de los que quieren falar n’asturianu colos derechos de los que dicen que nun lo entienden. ¿Pue conciliase la intolerancia, el derechu a la inorancia, cola tolerancia que supón un derechu civil básicu como falar la to llingua nel to parllamentu?

Na llexislatura pasada pidimos al Partíu Socialista qu’asumiera’l mandáu del so últimu congresu y apoyara la propuesta de reforma del Estatutu que presentaren los grupos de Podemos y Izquierda Xunida. Diximos que nun yera entendible reconocer una falta de derechos y al tiempu nun poner los medios pa correxila. Llamentablemente nun tuviemos éxitu. Esta reivindicación volvió inmediatamente al caxón de les coses aplazables. Dixéronnos: será pa la otra llexislatura...

Nella tamos, y llevamos yá cuasi añu y mediu de llexislatura ensin que veamos nenguna acción p’abrir la reforma del estatutu. ¿A qué tamos esperando? Yá ta bien de sides.

Sabemos qu’hai un virus que ta faciendonos la vida muncho más abegosa, pero nun nos tenemos qu’engañar: el virus nun ye’l culpable de que nun tengamos oficialidá nel añu 2020. Tampoco nun ye culpa de les aritmétiques parllamentaries. Que falta un votu pa los 27, dicen. Nun lo sabemos: nun sabemos si falta ún, si falten dos, si sobren o si en realidá falten toos. Hasta que nun s’abra la reforma del estatutu, lo que realmente falta ye voluntá.

Señor presidente Adrián Barbón: tóca-y a usté. Esperamos que nun abandone lo que tamién usté sabe ye de xusticia. El futuru va xulgalu, o por ser quien dignificó la situación de la llingua asturiana o por ser quien la dexó morrer desprotexida y albentestate. El momentu ye agora: l’asturianu, llingua oficial ¡yá!.

Semeya obra d'Iván G. Fernández.