Les medies xornaes suponen el 79,16 por cientu de los contratos de los maestros de Llingua Asturiana en Primaria

La precariedá ye, un añu más, el denominador común ente les maestres y maestros de Llingua Asturiana. El 79,16 por cientu de los contratos de Primaria son medies xornaes, y la falta de la especialidá convierte a la mayor parte en trabayadores temporales que nun tienen la posibilidá d’opositar, denuncia CC OO Enseñanza.

El sindicatu educativu critica’l mou nel que la Conseyería d’Eduacación planificó la ufierta de places na materia nes convocatories d’interinidaes pa esti cursu, dalgo que se vien repitiendo añu tres añu. Asina esplica que na primer axudicación, de les 185 places daes 174 yeren medies xornaes (79,45 por cientu), 10 d’elles itinerantes, y 38 completes (20,54 por cientu), 16 itinerantes.

Na segunda sacáronse 5 medies (71,4 por cientu) y 2 completes (28,5 por cientu), de la que 1 ye itinerante. En total, hasta’l vienres, ufiertáronse 192 places, 152 medies (79,16 por cientu) y 40 completes (20,83 por cientu), unes cifres asemeyaes a les del cursu pasáu, cuando esti sindicatu comunicó un 81,66 por cientu na primer axudicación, cifra que se disparaba hasta’l 95,77 por cientu en Secundaria.

Nesta última convocatoria tamién s’incluyeron 24 places completes de Primaria con hores de Llingua Asturiana, que se presenten como places COVID, esto ye, como resultáu de la mengua de la ratio d’alumnáu per aula. “Hai que precisar qu’esta ufierta fízose na segunda convocatoria, cuando les más de les places d’asturianu a media xornada yá taben axudicaes, y que les persones de la bolsa de Llingua Asturiana que nun formen parte de la llista d’Educación Primaria nun pudieron pidiles. Les places COVID, d’otra miente, tán suxetes a les necesidaes organizatives: nel casu de qu’hubiera que trancar el centru por razones sanitaries podríen cesar al profesoráu contratao”, espliquen dende’l sindicatu.

La necesidá de la especialidá docente

Esti panorama confirma una vegada más que “la situación del profesoráu de Llingua Asturiana ye enforma precaria”. Comisiones Obreres (CC OO) Enseñanza rellata que na mayor parte los casos son “trabayadores temporales que nun tienen la posibilidá de presentase a oposiciones, darréu que la Llingua Asturiana nun tien reconocida la especialidád docente”.

L’abusu de les contrataciones a media xornada “agrava la precariedá de les sos condiciones llaborales, ya qu’estes places suponen unos ingresos d’alredor de 800 euros al mes ya impliquen davezu desplazamientos o cambios de residencia”, añade. A esto hai que sumar el perxuiciu pal alumnáu, yá que nun permite la l’afitamientu de l’asignatura nos centros.

A la espera de la creación de la especialidá docente tán demandada por tol sector educativu y tantes vegaes prometida pol Gobiernu, CC OO Enseñanza esixe “establecer los mecanismos necesarios pa evitar la precarización del emplegu, garantizando una enseñanza de calidá”.

Na semeya, la conseyera d'Educación, Carmen Suárez Suárez, toma nota nún de los munchos alcuentros telemáticos que ta teniendo estes selmanes de cara al entamu del cursu.