“Elías nun tenía par harmonizando”, recuerda Fonsu Mielgo

La carrera musical d’Elías García va tar siempre aunida a la de Fonsu Mielgo. Pareya de gaita y tambor nos años 80, dambos foron parte de la pata uvieína de Llan de Cubel, la banda referente del folk asturianu, y hasta l’últimu momentu compartieron amistá, escenariu y vivencies; dalgunes d’elles Mielgo compárteles con Asturies.com nel cabudañu del músicu.

Col sestu discu de Llan de Cubel yá fináu, pendiente namái de la edición, llegó la noticia más murnia del 2019 pa la música asturiana. Elías García, un referente pa delles xeneraciones, dexábanos un martes del final del branu, el 10 de setiembre, hai agora un añu, con 51 primaveres.

Les redes sociales dieron altavoz díes después, el 14, a la noticia de la perda, que nun tardó en llegar a los medios de comunicación, y la tristura embargó a compañeros, collacios y siguidores de la so música. Una música, una trayeutoria, que dende mui mozu tuvo xunía a la de Mielgo.

“Conocílu nel añu 83 cuando yo tenía 18 años y él 14 pa 15”, recuerda, al tiempu qu’apunta una pequeña diferencia en gustos: “Yo yera más de Alan Stivel y el de Gwendal”. Dambos decidieron formar una pareya de gaita y tambor –“con 15 años tenía un dominiu total del instrumentu”– y mientres esi branu tuvieron tocando “n’El Fontán y en Doctor Casal pa ganar unes perruques”.

Col dineru que consiguió cola gaita esos meses, García pudo mercar l’instrumentu que vía a les bandes que-y prestaben. “Dedicóles a facese con discos y un bouzouki que viera en Musical Tommy”, rellata.

Nesi momentu, pa San Mateo del 83, Mielgo y Elías incorporaron al dúu a Chus Bello pa sumar una guitarra al tambor y a la gaita. Los trés quedaben “na casa de la güela d’Elías” pa ensayar y deprender, tocando pieces de bandes como Gwendal, unes cites a les qu’acudía davezu Daniel Lombas, músicu que tamién formaría parte del nomáu nucleu carbayón de Llan de Cubel.

“Elías y yo tocando pelo cai trunfábamos bastante, pero cuando se nos xuntó Chus foi la bomba”. Xunto col bercianu “contratáronnos como tríu pa tocar en Teberga, únicu conciertu que fiximos enantes de Llan de Cubel”.

Fiesta de Ciencies

El xerme de la histórica banda taría nuna folixa, en concreto na fiesta de San Alberto Magno, de la Facultá de Ciencies de la Universidá d’Uviéu, que se celebra en payares. Mielgo xuntóse esi día con Marcos Llope y un grupu de pixuetos, “porque él estudiaba pa biólogu y yo pa químicu”, nos que la música foi’l tema principal de conversación.

“Marcos y Guzmán Marqués teníen un grupu de música andina que yá funcionaba col nome de Llan de Cubel”, esplica Mielgo, que tornaría a atopar a Llope nel branu del añu siguiente, 1984, n’Ortigueira “cuando baxábemos pela cai tocando Elías y yo”. “Ellos tocaben la flauta y el violín y yera lo que nos faltaba a nosotros”, añade.

El siguiente pasu nun sería otru que xuntase. Los uvieínos desplazáronse a Cuideiru, “al desván de casa de Marcos”, onde tamién taría Ignaciu Llope, “que sería’l primer siguidor de la banda y una especia de cronista del grupu per munchu tiempu”, pa tocar: “foi un xubidón de la hostia”, esclama Mielgo.

Nesi puntu nacería’l sestetu col ánimu de facer folk basáu nel repetoriu tradicional asturianu, qu’adoptaría un poco más tarde’l nome yá esistente de Llan de Cubel en referencia al monte que separta, y al empar xune, Cuideiru y Pravia. Los sos integrantes, los uvieínos García (bouzouki), Mielgo (percusión y curdión), Bello (guitarra) y Lombas (panderu), y los pixuetos Llope (flauta) y Marqués (violín).

El debut

La primer actuación de la banda llegaría nel mes d’avientu d’esi añu, el día 28, nel Festival d’Arpes d’Uviéu na ilesia de San Isidoro, iniciativa de Lisardo Lombardía, convidaos por Fernando Largo, responsable del programa ‘Gaitas, arpas y zanfonas’ en Radio Asturias. Pa la cita prepararon una creación propia, ‘La isla de Rathlin’, que foi grabada.

“A ellos-yos debemos –Largo y Lombardía– l’ésitu que resultó depués, cola curiosidá poco corriente de que la primer actuación en públicu d’un grupu queda rexistrada nun discu. A partir d’ehí yá foi un non parar”, esplica Mielgu.

El primer conciertu completu nun tendría llugar hasta’l 30 de marzu del 1985 n’El Nido, “con un llargor d’una hora y pico”. Darréu, actuaciones en San Xuan n’Uviéu y en Xixón, y el 12 d’ochobre nes fiestes de San Froilán en Lugo, “col primer repertoriu asturianu dafechu”.

“Enxamás tuviemos otra intención que tocar lo que nos prestaba y como nos prestaba”, recuerda Mielgo. “Un folk cañeru y acústicu” sería’l soníu de Llan de Cubel que col tiempu quedaría mui definíu.

“Queríemos ser coherentes y honestos colo que facíemos”, sigue’l músicu, qu’apunta que pal primer reportoriu asturianu buscaron nos grupos etnográficos del momentu y fixeron un llabor de campu. Nel 1987 llegaría’l primer discu de la banda ‘Deva’, al que siguiríen otros cinco, l’últimu asoleyáu a lo último del añu pasáu, ‘La lluz encesa’, que grabó Elías, anque nun pudo ver la edición final del álbum.

Un perfeicionista

Sobre’l so compañeru rescampla “el so estilu y el so gustu”. “Nun tenía par harmonizando”, apunta.

“Anque en Llan tol mundu participa nos arreglos, lo qu’él preparaba diba a misa porque siempre taba perfeuto, como bon perfeicionista que yera. Pero como ‘xefe’ de les cuerdes siempre tuvo un pesu fundamental en toles decisiones arreglístiques y d’estilu porque componía y arreglaba mui bien. Tampoco nunca nun foi difícil ponese d’alcuerdu porque toos teníemos los mesmos gustos”, esplica Mielgo sobre un gran músicu qu’hai un añu coló, pero que yá ye historia del folk y de la música asturiana.

Les amueses de ciñu vivíes nesti tiempu por parte d’aficionaos y colegues de profesión, y los testimonios sobre la buelga que-yos dexó’l so llabor, son bona muestra d’ello.

Na semeya, formación de Llan de Cubel que grabó' 'La lluz encesa', con García detrás a la derecha y Mielgo, nel centru.