Salú llevanta l'alerta naranxa nos cinco conceyos del oriente

Asturies rexistra 81 casos nuevos de COVID-19 nes dos xornaes últimes y una muerte.

Catorce díes depués, tiempu que se tien de referencia pa la incubación del coronavirus SARS-CoV-2, la Conseyería de Salú llevantó l'alerta naranxa en Ribeseya, Llanes, Parres, Cangues d’Onís y Cabrales, los cinco conceyos del oriente con más incidencia de la enfermedá y los únicos con esi estáu de prevención. Tres constatar que la situación ye anguaño contenida, les autoridaes sanitarias decidieron caltener namái una vixilancia estrecha nestos conceyos, con xuntes de la Comisión de Siguimientu –integrada por los ayuntamientos, la Federación Asturiana de Conceyos, la conseyería y la Delegación del Gobiernu estatal n'Asturies– de manera selmana pa siguir evaluando la situación polo menos nos 14 díes próximos.

No que respeuta a los datos de la COVID-19 nel país, el llunes hebo 16 contaxos y ayeri, 65. D'ellos, dos tuvieron que ser hospitalizaos.

Un residente de Les Arriondes

A estes cifres hai que sumar una muerte, la 344 dende que principió l'andanciu. Trátase d'un internu d'una residencia de Les Arriondes que taba ingresáu nel Hospital Universitariu Central d'Asturies (HUCA) que finó'l llunes.

Anguaño hai hospitalizaos 43 persones nel país con COVID-19, de los que 8 tán na UCI y 35, en planta.

Na semeya, el mirador d'El Fitu, en Parres.