SUATEA y la comunidá escolar refuga les instrucciones pal cursu qu'entra

Publicao nel BOPA les regulaciones pal entamu presencial de les clases nel cursu escolar 2020-2021 y s’aprueben les instrucciones d’organización pal aniciu del nuevu cursu condicionáu pol andanciu de la CoViD-19. Estes instrucciones van aplicase hasta que s’acabe la crisis sanitaria.

La resolución contién munches de les instrucciones yá presentaes na Mesa Sectorial d’Educación y que fueron refugaes por sindicatu SUATEA.

Según el sindicatu  esta resolución nun dispón d’una memoria económica y nun garantiza la calidá, la equidá educativa, nin la salú de la comunidá escolar. Amás, apunten que ye inconcreta y imprecisa, y nun recueye denguna de les sos propuestes. Tamién dispón otres midíes nin siquier negociaes en Mesa, como crear grupos internivel pa llograr ratios de menos de 21 alumnos/es, o formar grupos en función de la optativa escoyida, que contradicen principios pedagóxicos básicos.

Amás del refugu de SUATEA, el Conseyu Escolar d’Asturies, refugó estes instrucciones pola mayoría de les organizaciones representaes nelli.

Por too ello, SUATEA va plantegar al restu organizaciones sindicales, representantes de la comunidá escolar y organizaciones sociales, movilizaciones enantes del entamu del cursu 2020/21 pa llograr la financiación necesaria p’afrontar la situación d’escepcionalidá provocada pola enfermedá nel ámbitu educativu, ansina como la contratación de más personal p’atender a la diversidá de situaciones educatives del alumnáu,  y una merma de les ratios en tolos niveles escolares. Pa finar, dexixen tamien materiales sanitarios, TIC y didácticos afayadizos.