Reflexón d’andanciu

Podría nun esistir el mundiu que daría igual. Podríen nun esistir les tos miraes atristayaes pol pasu’l tiempu, pola intensidá vivida.

Polos vértigos.

Podría aparar de soplar el vientu. Podría españar el sol, y sicasí, y en sabiéndolo… siguiríemos lluchando por sobrevivir… siempres… de la meyor manera posible.

Somos un país, Asturies, que se noma igual dende que tenemos noticia. Invariable’l so nomatu, ya invariable la concepción foriata ya interna de ser un pueblu indómitu (lo cual ye mentira), y rabalbu (lo cual pue ser verdá). Resistente (na derrota permanente). Y pesimista (y pesie a too constante).

Somos los primeros en too…y por embargu aportamos siempres tarde a les coses.

Somos catapulta de llibertaes y si tenemos ocasión paez qu’apertamos les calamiyeres que mos ponen.

Desconfiaos énte nós mesmos, énte nós mesmes. Y con una potencialidá manifesta que ye lo qu’ofiende.

Porque ofiende tener tanta capacidá na bas de los nuesos principios. Nos valores que mos tovieron acompangando –fueren estos valores naturalizaos, o ciertamente en compromisu con ellos–. Lo que supón o supondría una ventaya que podría –épica incluyida–, “llevantar al mundiu”.

Nun sé mui bien a qué se debe que’l nuesu texíu productivu desapaeza; que la nuesa demografía tea nuna situación castastrófica. Nun sé cual ye’l motivu d’amosar la nuesa identidá con tola so fuercia… de forma folclórica… y non la d'imponer propiamente na so conxugación política. Nun sé cuál ye’l motivu del autoodiu. Tampoco’l que nun esistan polítiques qu’igüen, a lo menos, les partes sustantives –ensegún la economización del mundiu–… Aquelles midíes que pesie a matar a un pueblu, salvaríen (maxinamos) una sociedá.

A nun ser que nun seya posible tener sociedá asturiana ensin la so concepción mayúscula de pueblu.

Asturies, nel sentíu románticu’l términu, merez un pueblu que faiga por nun desapaecer.

Sicasí, como tol mundiu sabe los territorios como tales, nun conocen qué ye eso. De fechu, el territoriu siguirá ehí, pero non necesariamente’l pueblu que lu habitó. Y nun ye tanto falar d’Asturies, como saber cuál ye realmente’l compromisu, la consciencia, la determinación de los y les sos habitantes pa con ellos y elles mesmes. Porque ellos y elles son Asturies. Asturies ensin pueblu ye namái que monte, prau y mar. Accidentes xeográficos ensin trascendencia denguna.

Podríemos, definitivamente, garrar con puxu les hestories asocedíes nesti terruñu. Y tamién, por supuestu, les fazañes y les posiciones de los nuesos ancestros; de los vieyos y les vieyes habitantes d’esti espaciu verdosu y amontañáu, regáu pola mar.

Pero dende llueu, lo que probablemente se necesite seya perder el mieu a interrellacionanos ente nós. A baxar les converses, les idees, los plantegamientos, a la realidá material de les coses… Bañales si se quier n’halos máxicos que mos puean superar, trescender…, pero non engañar.

Lo que probablemente se necesite seya evitar a toa costa esos pensamientos de desconfiances constantes, de discutinios constantes ente persones asemeyaes, que llueu finen nuna suerte d’enfrentamientos globales: ente organizaciones o entidaes. Los purismos y los grandonismos; los moralismos; la prepotencia de quienes quiciabes nun momentu dau creyeron cincar el cielu, y namái foi l’espeyismu d’una ñube baxa.

Los y les que taben seguros de sí mesmos, y aquelles qu’arrenunciaben por cuasi traición facer daqué con otres asemeyaes.

Y un llargu etcétera que mete miéu al pánicu.

Falen, por garrar una migayina d’actualidá, de 'sorpasso' nes eleiciones gallegues, del BNG sol PSG… Un ésitu esperanzador, insuficiente. Porque delantre tienen una mayoría ablucante de les dereches concentraes nel lliderazgu de Feijóo. Pero ye que, nel añu 2015, nel nuesu país tuviemos un resultáu dignu ya interesante de lo que taba, ta o debiere tar a la esquierda de la FSA. Tanto nos postulaos socieconómicos, como n’aquellos que cinquen los aspeutos identitarios y soberanos del nuesu país.

Nel añu 2015 la FSA foi escarmada por munchos de los y les sos votantes que dirixeron el so votu fundamentalmente al recién creyáu Podemos Asturies. La FSA tuvo daquella 142.080 votos; Podemos Asturies 102.178, ya Izquierda Xunida 64.114. Entedambos partíos declaraos tresformadores obtuvieron los mesmos escaños que la FSA pero la friolera de 166.292 votos. Más que l’eternu partíu asturianu. Ello ye, que la xuntura de Podemos Asturies con Izquierda Xunida atropaba cuasi que 25.000 votos más que la FSA.

Eso sí que foi un 'sorpasso'. Pero tamién foi un fracasu de les izquierdes al nun se poner d’alcuerdu pa forciar o bien una investidura d’Emilio León colos votos d’Izquierda Xunida (que sedría lo lóxico por resultáu); o de Gaspar Llamazares (pesie al paisanu), que sedría lo menos lóxico en resultáu, pero lo más estratéxicamente afayadizu pa forciar cambeos reales, dada la posición llonxana de Llamazares pa con Emilio.

Una oportunidá d’oru, sinón pa camudar el status quo, sí pa pega-y un sustu a dalgún ilumináu, o retratar a dalgún qu’otru sinvergüenza. Dende llueu, aquello podría daquella iluminar España entera. Nunos años nos que se necesitaba un poco d’aliendu, esperanza y referentes de dalguna clas –y qué meyor que fuere’l país de la épica constante–.

Nun pudo ser.

Esa oportunidá yá coló. Nun s’achisba, y provién d’un momentu particular d’escarmu y llamada d’atención d’una bona parte de la sociedá asturiana normalmente inclinada a votar a la FSA.

Equí, entós, güei, y por fin, tendremos de poner procuru en cómo encadarmamos lo que venga. Porque repetir erros, buscar autoescuses, construyir penriba la sociedá, caltener les suspicacies frente a potenciales compañeros y compañeres, siguir poniéndomos autotorgues…, va llevanos aceleradamente a la hiperderrota, pero tamién a la desapaición.

Pablo M. Testa ye doctor en Historia, profesor y investigador en Ciencies Sociales y Estudios Culturales.