El biltu de COVID-19 del chigre de La Corredoria acumula 6 positivos

El segundu biltu de COVID-19 que rexistra Asturies después del d'occidente, el de La Corredoria, acumula 6 positivos. El sábadu dábase anuncia de trés contaxos venceyaos a la cervecería Urban’s, dos trabayadores y un veceru, que’l domingu sumuba ún más, un contautu estrechu, y esti llunes dos, clientes del llocal.

Éstos dos últimos lleguen tres la realización de 496 pruebes PCR a contautos estrechos de los primeros afectaos y veceros que se sumen a otres 300 feches namái conocese’l casu. El total d’afectaos por esti biltu, de momentu, son 6 persones, mentes que la Conseyería de Salú sigue citando a persones que pasaron pel llocal uvieín nestes xornaes últimes pa qu’acudan al autocovid del Hospital Universitariu Central d’Asturies (HUCA), asitiáu na redolada del Serviciu d’Urxencias, recomendando-yos que mentantu restrinxan la so vida social y guarden les midíes de seguranza.

Amás d’esti brotu, Asturies sumó otros 7 casos de COVID-19 esta fin de selmana. El sábadu diose anuncia de 2, un contautu estrechu en siguimientu venceyáu con un casu importáu de Zaragoza y un home procedente de México.

Ayeri, mentes, dieron positivu dos contautos estrechos en siguimientu pol Serviciu de Vixilancia Epidemiolóxica con dos casos de Cantabria. Por último, güei comunicáronse 3 casos: una muyer qu’acudió al so centru de salú con síntomes compatibles cola COVID-19 y un contautu d’ésta, asina como un mozu procedente d’Andalucía, en concreto de Málaga.

Con estos afeutaos últimos, Asturies yá suma 32 casos nestes selmanes recientes.