Los escolinos asturianos algamen el segundu meyor resultáu del Estáu nel informe PISA en comprensión llectora

L’últimu informe del Programa Internacional d’Evaluación d’Estudiantes (PISA, poles sos sigles n’inglés) asitia a los asturianos como los segundos meyores en compresión llectora, namái detrás de los de Castilla y Lleón. Asturies ta perriba de la media del alumnáu de la Xunión Europea (XE) y de los países de la OCDE.

El sistema educativu asturianu llogra unos resultaos satisfactorios en rellación cola competencia llectora, según los resultaos del 2018 del informe PISA. El país algama una calificación de 495, 18 puntos superior al promediu estatal (477), 8 percima de la media de los estaos de la Organización pa la Cooperación y el Desarrollu Económicos (487) y 6 sobre'l promediu de la XE (489), mentes que Castilla y Lleón tuvo 497 y, pela parte baxa, Ceuta un indicador de 404; Melilla, de 438; y Estremaúra, de 464.

Nel estudiu participaron 2.096 estudiantes de 55 centros, que representen el 98 por cientu de la población asturiana de 15 años. L’informe tamién reflexa qu’en Matemátiques el promediu de los escolinos d’Asturies ye 10 puntos superior a los del Estáu y 2 colos de la OCDE; y 13 y 7, de manera respeutiva, en Ciencies.