Fernando de Luxán lleva’l concursu de guiones de Formientu

El I Concursu de Guión de Curtiumetraxe n’Asturianu y Gallego-asturiano Formientu, convocáu nel marcu del #FormientuEnCasaFest, foi pa la obra ‘De cuando l’agua’ de Fernando de Luxán. L’actu d’entrega del premiu va celebrase esti sábadu na sede de Cuatro Gotes Producciones.

La charra-taller virtual de Pablo A. Quiroga, responsable d’Algamar Producciones, 'El guión nel curtiumetraxe asturianu' dientro de la iniciativa entamada por Formientu pa poner en valir la cultura asturiana pel confinamientu pol estáu d’alarma pandemia de COVID-19, sirvió de xerme a esta iniciativa, que consistía nel unvíu de guiones inéditos pa curtiumetraxes de temática llibre. La participación foi “abondante”, apunta la organización, con dos trabayos gallardonaos pol xuráu, quedando ermu’l tercer premiu.

El ganador foi De Luxán con ‘De cuando l’agua’, mentes que quedó en segundu llugar ‘Guetando a María García’, de Lluis Rodrigo Menéndez Menéndez. Dambos van recibir el sábadu, nun actu llendáu a los vencedores y a los miembros del xuráu previstu a les 19.30 hores nes instalaciones de Cuatro Gotes Producciones nel xixonés barriu L’Arena, un diploma y revistes de ‘Formientu’, llibros y discos como recompenses.