Jesús Suárez López alerta del “peligru de desaniciu” del Archivu de la Tradición Oral pola “falta d’apoyu institucional” y de la so posible salida a México

“Ye dalgo incomprensible”, repite Jesús Suárez López, responsable del Archivu de la Tradición Oral d’Asturies, “una ayalga oculta a los asturianos”. L'investigador alertó del so “peligru de desaniciu” pola “falta d’apoyu institucional” y nun refugó, que de siguir asina la situación, pueda salir a México dao l’interés de la UNAM.

Na sala de prensa de la Xunta Xeneral, acompañáu de Rafael Palacios, Suárez López espresó la so indignación y esmolecimientu pola situación d’un archivu que “sobrevive a dures penes” al recibir “cero” sofitos del Gobiernu tanto en “términos presupuestarios como loxísticos y infraestructures”. “Dende Podemos Asturies queremos poner en conocimientu de la sociedá asturiana la llamentable situación na que s’alcuentra l’Archivu de la Tradición Oral d’Asturies, un proyeutu que lleva más de 30 años d’andandura y que tien como oxetivos la documentación y la salvaguarda y difusión del patrimoniu inmaterial y oral d’Asturies, y que güei tien el riesgu de desapaecer”, avanzara enantes el diputáu.

Dende’l 1986 Suárez López entamó “un inmensu trabayu de campu”, en pallabres de Palacios, “pa rescatar de viva voz la memoria ancestral de les persones mayores y antepasaos”. Asina presenta un fondu documental de 1.000 hores de grabaciones sonores y audiovisuales con 30.000 entrevistes de tradición oral tres un trabayu de campu en 900 pueblos de 70 conceyos del país onde quedaron rexistraos cuentos, lleendes, salmos, conxuros, refranes o adivinances, amás de testimonios orales de la Guerra Civil o de los Neños de la Guerra, ente otros, siendo esti archivu la base del Atlas Sonoru de la Llingua Asturiana.

Una ayalga en peligru “que’l propiu ‘Plan Nacional de Salvaguarda del Patrimonio Cultural e Inmaterial del Ministerio de Cultura’ diz que constitúi l’actuación más relevante nel ámbitu del patrimoniu cultural y inmaterial que se rexistra nel ámbitu del Principáu d’Asturies”, y que’l Reglamentu de la Llei de Patrimoniu menciona “como entidá de referencia nesti campu y como matriz de datos pal censu del patrimoniu cultural y inmaterial d’Asturies”, apuntó’l so responsable. L’archivu cuenta tamién con reconocimientu internacional, como amuesa’l manifiestu robláu “por 250 investigadores, profesores y espertos de 30 países” que pidía al Gobiernu de Javier Fernández, na llexislatura anterior, sofitu pal mesmu.

“Nun hai que dexar que se pierda esta información. Pero nun ye sólo dexar que se pierda, ye ponela en valor; dala a conocer, difundila, da-yla accesibilida, que la sociedá asturiana pueda acceder a esa ayalga oculto”, siguó Suárez López. Nesi sen Palacios apuntó que’l Laboratorio Nacional de Materiales Orales (LANMO) de la Universidad Autónoma Nacional de México (UNAM) “ufrió les sos infraestructures y servicios téunicos pa la salvaguarda activa del fondu documental del Archivu de la Tradición Oral d’Asturies argumentando que, si bien ye cierto, que’l conteníu correspuende a primera instancia guardalu al Principáu d’Asturies, a la Universidá d’Uviéu y a la propia sociedá asturiana –y por esto tamos pidiendo equí que lu guardemos y protexemos–, la relevancia científica d’esti corpus tradiconal oral del ámbitu hispánicu failu acreedor de patrominiu cultural de la humanidá”.

Suárez López apuntó que “esti archivu sobrevive única y esclusivamente pola mio dedicación y esfuerzu personal, pero yá toi cansáu de bregar solu contra vientu y marea”. Y aseguró que “si nun se pon remediu a esta situación, con tol mio dolor y corazón, marcho col archivu pa México, onde m’ofrecieron seis meses d’estancia añales pa poner en marcha esto, y dende allí difundir los llogros y les espublizaciones al restu del mundu”.

Entruegues a Piñán

“Resulta incomprensible qu’una institución como l’Archivu de la Tradición Oral d’Asturies, que ta avalada pola comunidá científica internacional, tea anguaño en riesgu de desaniciu pola absoluta falta d’apoyu institucional del Principáu d’Asturies, y más por parte d’un equipu de Gobiernu qu’enarbolia la defensa de la llingua y la cultura asturiana como estandarte d’aición política”, añadió al tiempu que dixo nun entender por qué nun recibe nada del presupuestu dedicáu a Política Llingüística. Poro, quier treslladar a la conseyera Berta Piñán dos entrugues: “si esiste dalguna previsión pa facilitar l’accesibilidá pública de los fondos documentales d’esti archivu a los investigadores y al públicu en xeneral” y “si va tomar dalguna midida pa garantizar la salvaguarda activa de los fondos documentales d’esti archivu y la tresmisión a les xeneraciones futures”.

Palacios denunció por útlimo “la situación llamentable” del archivu, una “irresponsabilidá y dexadez imperdonable”, y anunció que “si’l Gobiernu d’Asturies nun toma les midíes afayadices pondremos en marcha toles iniciatives polítiques y parllamentaries que faigan falta col oxetivu de garantizar la salvaguarda y difusión de los bienes inmateriales esistentes n’Asturies con valor cultural y significáu pa la identidá y memoria coleutiva de los asturianos y les asturianes”, como obliga’l Reglamentu de la Llei de Patrimoniu Cultural.

Na imaxe, Suárez López y Palacios. Semeya obra d'Iván G. Fernández.