Barbón: "Tener a los nuesos mayores na nuestra acordanza y honralos ye un deber al tiempu qu'un arguyu"

El presidente Adrián Barbón emplegó l’asturianu nun cachu de la so intervención na inauguración del Texu de l’Alcordanza, memorial vivu a les víctimes de la COVID-19 n’Asturies. Los cinco texos plantaos na redolada nel HUCA, xunto a la ilesia de La Cadellada, tán acompañaos d’una gran placa billingüe d’aceru corten.

“Sé que los mios güelos nun me diben perdonar que nun supiera honrar los mayores, intentar siquiera tar a la so altura. Pa qué diba valir, si non, tar güei equí falando al aire, dicir palabres fríes de piedra, si nun fuéramos quién, si nun demostráramos el valor de lloralos. Los asturianos tenemos, tuvimos siempre, como seña d'identidá, el respetu y el reconocimientu constante a los nuestros mayores como auténticu patrimoniu de lo que somos. Tenelos na nuestra acordanza y honralos ye un deber al tiempu qu'un arguyu”, espresó en llingua asturiana nuna intervención qu’abrió l’actu solemne.

Baxo la mirada de les autoridaes, ente ellos los ex presidentes Pedro de Silva y Juan Luis Rodríguez-Vigil, añadió que “deberíemos nomar una per una toles víctimes pa dici-yos que tamos deprendiendo, qu’entendimos que toos dependemos de toos y promete-yos que sabremos honralos cola memoria que merecen, qu’Asturies, la so patria y la de nueso, nun-yos escaecerá”. Tamién faló de la simboloxía de los texos, “árboles de la eternidá y de la vida”, escoyíos “pa que nos sobrevivan y falen al futuru nun homenaxe vivu, como vivu queremos mantener el recuerdu de les nueses víctimes”.

Na imaxe, los texos que componen esti memorial vivu. Semeya obra d'Inaciu Galán.

Darréu, Mily Cimadevilla lleó un poema que Carmen Yáñez escribió’l so maríu, l’escritor chilenu Luis Sepúlveda, primer contaxáu de COVID-19 n’Asturies, enfermedá que finó cola so vida. Pablo Carrera interpretó a la gaita la ‘Marcha d’Antón el Neñu’ mientres Barbón posaba un ramu de roses blanques xunto al Texu de l’Alcordanza, el de mayor tamañu de los cinco, tres un minutu de silenciu, y zarró l’actu tocando l’himnu del país.

Texos per toda Asturies

El Gobiernu repartió texos per tolos conceyos pa que sigan, si lo creen oportunu, l’aición de plantar un texu en memoria de les víctimes. Mieres y Avilés son dalgunos de los llugares que yá procedieron a esti homenaxe.