1.997 empreses vuelven a l'actividá tres un ERTE

Son 10.285 los trabayadores asturianos que yá se reincorporaron a los sos puestos.

La vuelta progresiva a l’actividá económica desque acabó l’estáu d’alarma ta treslladándose al mercáu llaboral n’Asturies, con mengües nel desemplegu y un ameyoramientu notable na afiliación a la Seguridá Social. Hasta ayeri 1.997 empreses comunicaren a la Conseyería d’Industria, Emplegu y Promoción Económica la suspensión definitiva de los espedientes de regulación d’empléu temporales (ERTE) aplicaos dende mediaos de marzu, cuando entamó l'estáu d'alarma.

D’esta manera, según los datos que remana la Direición Xeneral d’Emplegu y Formación como autoridá llaboral nel país, 10.285 persones yá se reincorporaron a los sos puestos de trabayu. Estes cifres faen referencia a los ERTE autorizaos y tramitaos pol Gobiernu y nun inclúín les de les desafectaciones parciales d'emplegaos en regulación, de comunicación nun obligatoria a l'Alministración, nin sobre los espedientes d’ámbitu estatal.

Nesti tiempu tramitáronse 12.575 solicitúes d’ERTE, qu'afeuten a 53.192 trabayadores, lo que supón el 99,81 por cientu del total presentáu dende’l 11 de marzu. D’ellos, 11.309 tienen la consideranza de fuercia mayor, que tocaron a 40.985 persones, y los 1.266 restantes, por mor d'otres causes, llevaron a 12.207 emplegaos a la suspensión d’empléu o a la mengua de xornada.