Asturies vixila’l biltu d’A Mariña, onde 71.000 persones tán confinaes hasta les eleiciones gallegues

El Gobiernu asturianu estrema la vixilancia nel occidente del país por cuenta’l biltu de COVID-19 que ta sufriendo A Mariña, rexón que fai llende con Asturies. La Xunta de Galicia decidió confinar a los 71.000 habitantes d’esta zona per cinco díes, hasta’l sábadu, xornada previa a la convocatoria eleutoral gallega del 12-X.

Dende la medianueche pasada la población de 14 conceyos d’A Mariña –A Pontenova ta incluyíu na area sanitaria de Lugo capital– nun pueden salir de la zona, anque sí ta permitida la circulación interna. La Guardia Civil vixila que naide nun acceda al llugar, con controles n’Asturies n’autovía del Cantábricu, permitiendo’l pasu pa siguir l’A8 en direición Villalba.

La Xunta decidió zarrar esta rexón per cinco díes pol biltu, con más de 100 positivos, ente ellos la de l’asturiana qu’anunció Adrián Barbón el xueves y que finalmente contabiliza Galicia. Recomiéndase los menos desplazamientos posibles y non salir del conceyu, con pieslle de la hostelería dende medianueche, reducciones d’aforu y imposibilidá d’usar la barra, ente otres restricciones.

Énte esta situación, el Gobiernu asturianu estrema la vixilancia nel occidente del país, sobre manera nes árees sanitaries con cabeceres en Xarrio y Avilés, pa frenar una posible tresmisión comunitaria por mor de la movilidá tradicional qu’hai ente los dos países per Castropol. Les autoridaes sanitarias piden a les persones que presenten dificultaes respiratories, tos seco o ausencia del gustu y del olfatu de sópitu que se pongan en contautu per teléfonu col so centru de salú o col 112, onde-yos darán les indicaciones afayadices.

Hasta’l sábadu

Na medianueche del vienres va finar esti confinamientu de cinco díes, un llargor que sorprende cuando lo normal mientres esta pandemia taba en periodos de catorce díes pola esistencia de casos na que la incubación del coronavirus SARS-Cov2 llegaba hasta les dos selmanes. La razón d’esti espaciu curtiu de confinamientu son les eleiciones gallegues del domingu, lo que pue suponer un problema pa les autoridaes gallegues nel casu de que sigan xubiendo les cifres de positivos n’A Mariña qu'obliguen a allargar o endurecer les restricciones qu'afeuten a les 71.000 persones d'esta rexón.

Na imaxe, Ponte dos Santos, que xune Galicia y Asturies, dende Ribadeo. Semeya obra de Certo Xornal baxo llicencia CC BY 2.0.