L'estudiu de seroprevalencia de la COVID-19 conclúi que namái'l 1,9 por cientu de los asturianos tien anticuerpos

Los resultaos finales del estudiu de seroprevalencia de la COVID-19 afita que namái’l 1,9 por cientu de les asturianes y asturianos xeneró anticuerpos IgG frente al coronavirus SARS-Cov2. Seis provincies tienen datos más baxos que’l país, siendo la media estatal del 5,2 por cientu, mui lloñe de la inmunidá de rebañu.

Si nel primer avance Asturies rexistraba un 1,8 –finalmente modificóse al 1,9– y nel segundu esta cantidá baxaba al 1,6 por cientu, namái per detrás de Ceuta, Huelva y Illes Balears, los datos finales d’esti estudiu ambiciosu conclúin que’l 1,9 por cientu de la población asturiana pasó la enfermedá causada pol coronavirus. Ésti entamó’l 27 d’abril, con primeros tests rápidos fechos hasta’l 11 de mayu, desendolcándose la segunda ronda del 18 de mayu al 1 de xunu, y la tercera del 8 al 22 de xunu, cola participación a nivel estatal de 68.296 persones, un 77 por cientu de los contautaos, de los qu’unos 1.700 yeren asturianos (1.550, 1.712 y 1.703, de manera respeutiva).

Los resultaos rescamplen la variabilidá xeográfica de la incidencia de la COVID-19. La ciudá autónoma de Ceuta, con un 0,7 por cientu, y Huelva, con 1,2 por cientu, son los territorios con menos incidencia de la COVID-19, siguíos d’Illes Balears (1,4 por cientu), Lugo y Tarragona (1,5 por cientu), y A Coruña y Murcia (1,6 por cientu), mentes onde más se dio foi en Soria (14,4 por cientu), Segovia (12,4 por cientu) y Madrid (11,7 por cientu), siendo la media estatal del 5,2 por cientu.

Estos datos reflexen lo lloñe que ta l’Estáu de les cifres que se consideren inmunidá de rebañu, un 60 por cientu según los espertos, situación na qu’habría un númberu suficiente de persones inmunes que permitiría controlar la pandemia. Llegar a eses cantidaes, como pretendíen dellos países al entamu del andanciu pa evitar los confinamientos, provocaría cifres de muertes terrorífiques.

Calca equí pa consultar l'informe defitivu del estudiu de seroprevalencia de la COVID-19.