Asturies caltiénse un día más llibre de COVID-19

Los datos diarios de la Conseyería de Salú dan catorce xornaes siguíes ensin contaxos, mentes que los del Ministeriu de Sanidá aumenten esta cifra hasta les 18.

Asturies ye la primer comunidá autonóma del Estáu en completar un ciclu de dos selmanes, les que se tienen como referencia pa incubar la enfermedá causada pol coronavirus SARS-CoV-2. Namái la ciudá autónoma de Ceuta ta na mesma posición, según apunten dende'l ministeriu, con una población diez vegaes menor.

L'últimu positivu que comunicó la conseyería foi'l 15 de xunu. Dende esa xornada súmense 14 díes nos que nun se rexistraron casos nuevos de COVID-19 nel país.

Tamién hai que celebrar l'ausencia de finaos dende'l día 21, muerte anunciada cinco díes depués, el vienres.

Ensin cambios

Ayeri repitiéronse les mesmes cifre de la pandemia que'l domingu. El númberu de positivos siguen en 2.435, el de persones que perdieron la vida en 335 y el de curaciones en 2.055, mentes que permanecen ingresaes 5 pacientes na UCI y 1 en planta.