El repartu del Fondu de Compensación pola COVID-19 va tener en cuenta l'avieyamientu

La demanda d'Asturies de valorar "la población protexida equivalente" va ser atendida pol Gobiernu estatal.

La videoconferencia de presidentes de los domingos sirvió pa conocer los cambios de criteriu nel repartu del Fondu de Compensación pola COVID-19, los 16.000 millones que l'Executivu va repartir ente les comunidaes autónomes pa compensar el gastu p'afrontar la crisis sanitaria pola pandemia. Nun primer momentu 10.000 millones diben tar destinaos al sanitariu, 5.000 pa la perda d'ingresos tributarios y 1.000 pal social, cantidaes qu'agora se modifiquen pa la primer y tercer partida.

Al gastu sanitariu van dedicase 9.000 millones, mentes qu'a Educación, encuadrada no social, van dir 2.000 millones. La entrega de les perres, tresferencies direutes a les autonomíes, va facese en cuatro tramos, el primeru en xunu de 6.000 millones del fondu destináu a lo sanitario.

El Gobiernu estatal va tener en cuenta ente los criterios pa facer el repartu, amás de la población de los territorios, "la población protexida equivalente, que ye un conceptu sanitariu que tien en cuenta la nuesa situación especial: mayores de 65 años o otres situaciones que compliquen la prestación de servicios sanitarios", esplicó tres la xunta telemática Adrián Barbón. Amás, la variable de población aumenta d'un 20 por cientu a 35 por cientu.

"Esto ye una bona midida p'Asturies", aseguró'l presidente. Otra modificación que tamién beneficia al país a la hora de repartir esos 9.000 millones d'euros ye qu'agora nun se tengan en cuenta namái les PCR positives, sinón toles pruebes feches, premiando l'esfuerciu d'autonomíes como l'asturiana nesi sen.

Semeya obra d'Armando Álvarez.