Asturies decide pidir el pase a la fase 3

La evolución epidemiolóxica d’estos díes llevó a Asturies a pidir finalmente na tarde del martes el pase a la fase 3, que’l calendariu marca pal llunes, cabera del procesu de desescalada. Sicasí, el Gobiernu avisa de que, nel casu de camudar la tendencia, refugará avanzar y permanecerá en fase 2 por prevención.

Los informes del Serviciu de Vixilancia Epidemiolóxica de la Direición Xeneral de Salú Pública “y tamién, la reaición rápida na detección aína de los casos y intervención de les residencies de mayores que tuvieron biltos”, esto ye, el xixonés Instituto Gerontológico Astur con 19 casos (4 trabayadores y 15 internos) y l’uvieína Santa Teresa (1 y 3), llevaron al Executivu al pidimientu, según confirmó’l presidente Adrián Barbón. “En tou casu, comunicamos al Ministeriu de Sanidá que si d’equí al llunes, los datos de la nuesa comunidad autónoma empeoraren y se diera un biltu incontrolable nesti tiempu, refugaría pasar a la fase 3 y quedaríamosnos na fase 2. Prevenir enantes que llamentar”, puntualizó.

La capacidá de respuesta por parte de vixilancia epidemiolóxica y del serviciu de salú valoróse como un elemento positivu a la hora de solicitar el cambiu de fase, asina como la non esistencia de tresmisión comunitaria de virus nel momentu actual y que los casos esistentes tean llocalizaos en puntos mui concretos del entornu sociosanitariu. Sicasí, dende’l Gobiernu llamen a la responsabilidá individual y coleutiva de les asturianes y asturianos pa siguir avanzando na desescalada.

“Debemos usar mázcara, guardar la distancia de dos metros y mantener midíes d’hixene”, apuntó Barbón. “Nes manes de caún de nosotros y nosotres ta evitar qu’haya biltos nuevos, contaxos nuevos y, poro, muertes nueves”, finó al tiempu en qu’insistió en que “el coronovarus sigue nes cais”.

Na semeya, el parque xixonés de Los Pericones nun momentu de la desescalada.