Reabre'l plazu pal pagu de les tases de la prueba de nivel B2 d’asturianu

Anque entovía nun hai fecha confirmada pa la prueba de certificación d’asturianu adaptada al Marcu Común Européu de Referencia pa les Llingües de nivel B2 intermediu –ta anunciáu pal trimestre últimu del añu–, yá ta abiertu’l plazu pal pagu de les tases del esame. El miércoles 10 ye’l caberu pa facer el procedimientu.

La declaración del estáu d’alarma a los trés díes de comenzar el mesmu impidió a una gran mayoría de les 500 persones con plaza de los 800 presentaos el poder facer el pagu. Nel so momentu la Conseyería d’Educación anunció que s’abiría un plazu nuevu una vegada fináu l’estáu d’alarma, pero ésti adelantóse definitivamente a estos díes.

Asina, dende güei y hasta’l miércoles 10 los aspirantes al B2 d’asturianu qu’entovía nun pagaran los 31,63 euros –preciu únicu a esceición de los que tengan descuentu por familia numberosa o exención por delles circunstancies– van poder facelo na web de los Servicios Tributarios del país o nes entidaes bancaries collaboradores –Caja Rural de Asturias, Liberbank, BBVA, Santander, Herrero-Sabadell y La Caixa–, pa depués entregar el xustificante del pagu nos centros d'inscripción. El modelu 046 ye’l que se necesita rellenar pa facer l’abonu de les tases.

Na semeya, el mierense IES Bernaldo de Quirós, ún de los cuatro centros onde presentar el xustificante del pagu de les tases.