L’auditoría de Foro revela “posibles irregularidaes mui graves” na xestión d’Álvarez-Cascos del 2011 al 2019

Francisco Álvarez-Cascos cobró más d’un millón d’euros de Foro en dietes y sueldos, y pasó más de 230.000 euros en gastos al partíu del 2011 al 2019. La formación va llevar a los tribunales la xestión del so fundador al deteutar “posibles irregularidaes mui graves”, confirmó esti xueves l’actual presidenta, Carmen Moriyón.

“La Comisión Direutiva de Foro fixo güei –por ayeri– un exerciciu de decencia política énte la sociedá asturiana”, afirmó la ex alcaldesa de Xixón, qu’aseguró sentise “deceicionada, nun m’avergoña dicilo”. “Acordamos que ye obligao tomar les midíes xudiciales que procedan a la vista de los resultaos de l’auditoría”, añadió, yá que “revela posibles irregularidades mui graves, como que, por exemplu, Foro pagó una sede en Madrid que naide nun pisó y que naidie nun conoció”.

El llocal sería propiedá d’un sociedá compartida cola so ex muyer María Porto, pola que’l partíu abonaría 174.000 euros. Son dalgunes de les cifres que da a conocer l’auditoría encargada n’avientu.

Ésti revela qu’Álvarez-Cascos cobró 1.043.868 n’ocho años en sueldu y dietes. A esta cantidá hai que sumar 230.000 euros en gastos personales tan llamativos como la reparación d’un coche de Porto, agospios pa dir a pescar, teléfonos de los fíos o un psicotéunicu pa la llicencia d’armes, ente otros.

Espulsión de Leal

La Comisión Direutiva decidió tamién, con 22 votos a favor y ún en contra, la espulsión de Pedro Leal del partíu. El llangreanu, ex presidente de Foro tres la dimisión de Crisitina Coto y la celebración del tercer congresu que confirmó a Moriyón, ye ún de los dos diputaos de la formación na Xunta Xeneral.

Na semeya, el diputáu Adrián Pumares y Moriyón ayeri tres la Comisión Direutiva.