Los conteníos audiovisuales n’asturianu garren puxu col confinamientu

Los dos meses de confinamientu de la población, agora flexibilizáu pola desescalada, dexaron un aumentu importante de los conteníos audiovisuales n’asturianu, con proyeutos qu’entá se caltienen. Na televisión asturiana y n'Internet, en mayor midida, atopamos clases, series, entrevistes, presentaciones, charres o conciertos.

El tiempu en casa y la conxugación de la necesidá de contar coses o informar de la situación cola de los ciudadanos d’ocupar el so tiempu d’ociu llevaron a la puesta en marcha de proyeutos audiovisuales n’asturianu o la potenciación de los yá esistentes. El resultáu foi una importante cantidá de material y conteníos en llingua asturiana de la que se beneficia tola comunidá asturfalante.

Quiciabes el que más importancia tien, pola so gran difusión al traviés de la TPA, son les clases de Llingua Asturiana y Lliteratura d’Educastur TV, que s’emite toles mañanes a les 10.30 hores de llunes a vienres dientro del espaciu ‘Aprende con TPA’. El maestru Inaciu Galán encargóse hasta la fecha de 15 pa Secundaria y Bachilleratu, coles sos correspondientes xeres pa trabayales depués de la emisión gracies a un blogue, mentes que Víctor Suárez va sumase agora con conteníos pa los escolinos de Primaria.

Más de 100 vídeos nuevos

Una de les primeres iniciatives d’esti confinamientu foi’l #FormientuEnCasaFest, coordináu precisamente por Galán col sofitu de Diego Solís. La revista de lliteratura moza ‘Formientu’ pretendía “poner en valir la importancia de la cultura asturiana y la llingua asturiana nun momentu como ésti” al empar que “ufrir a la xente actividaes lliteraries y culturales que valgan pa face-yos pasar el tiempu d’esti enzarru nes cases”.

El resultáu foron más de 60 actividaes per dos meses, hasta que comenzó la desescalada, con emisiones en direuto per Facebook, que dexaron charres, conciertos, presentaciones, recitales poétiques o cuentacuentos pa consultar. Alfredo González, Silvia Quesada, Sergio Buelga, Raquel F. Menéndez, Xaime Martínez, Arantza Margolles, Marisa Valle Roso, Laura Marcos, Xosé Ambás y Ramsés Ilesies, Rodrigo Cuevas, Pilar Sánchez Vicente o María Esther García López foron dalgunos de los participantes.

N’Asturies.com tamién aprovechamos esta situación novedosa pa incorporar más conteníos audiovisuales, con vídeos de diferente calter protagonizaos por Faustino Zapico, David Guardado, Cerezal, Bras Rodrigo, Gonzalo González Barreñada o Carme Pérez, de la Comuna d’Asturies, nos que trataben dellos temes, falábennos de los sos proyeutos o recitaben un poema. Zapico, que trató na nuesa canal sobre’l ‘mal de la moda’ o ‘gripe española’, tamién xubió al propiu en YouTube una serie entitulada ‘Historia d’Asturies’ na selmana del Día de les Lletres Asturianes.

‘Horros y frixuelos’ ye’l nome del de Damián Barreiro, que quixo potencialu mientres la cuarentena con una estaya d’entrevistes entitulaes ‘Cafetín con pingarates’, primero p'analizar dende una óptica asturiana la situación xenerada pola pandemia de COVID-19 y más alantre pa tratar cuestiones del ámbitu de trabayu del convidáu. Xosé Antón González Riaño, el propiu Zapico, Xune Elipe, Rodrigo Cuevas, Lluis Nel Estrada o Andrea Joglar contautaron dende los sos llares col periodista, que tamién siguió xubiendo vídeos de diferente calter.

Conferencies y formación

Énte la imposibilidá de disponer del so espaciu físicu, el Llar La Llegra decidió llevar a la rede les conferencies que programa de manera habitual. Nesti tiempu Galán, Sergio Sánchez Collantes o Patrick W. Zimmerman, ente otros, trataron diferentes temes en direuto, respondiendo tamién les entrugues del público de manera virtual.

Tamién en YouTube hai espaciu pa la formación, tanto p’adultos como pa la reciella. El Taller d’Asturianu de Sariegu nun aparó mientres el confinamientu, poniendo les clases pela rede y abriéndoles a tol mundu al traviés d’Internet, mentes que los más pequeños diviértense con Superllingua.

La Estaya de la Llingua d’Avilés nun s’escació tampoco de los neños en 'La Reciella en Casa: La Cuarentena Presta' que programó delles actividaes. Pueden consultase, xunto con otros sobre Avilés con visites virtuales p’adultos, na canal de PlayPresta, plataforma qu’axunta a dellos youtubers y que tampoco nun dexó de xubir conteníos mientres la cuarentena.

Mentes, el Gobiernu punxo en marcha la iniciativa ‘Asturies, Cultura en Rede’, que tien anunciaos dellos conteníos n’asturianu nel qu’artistes, músicos, escritores y dibuxantes espliquen el so procesu creativu. Yá se conocen les pieces de Milio Ureta, Alfredo González, Pablo Casanueva, Ruma Barbero, Leticia Baselgas y Rodrigo Cuevas, mentes qu’entovía queden otros munchos por espublizar –tolos díes, de llunes a vienres, asoléyase un videu nuevu–.

Una serie pa rir y música pa disfrutar

La novedá última no que respeuta a conteníos n’asturianu ye l’entamu de la comedia de situación ‘Confinaos’, que ta teniendo munchu ésitu. El popular videu de Les Fartures ‘#devolvéinosloschigres’ foi’l xerme d’un proyeutu mayor al que s’apuntaron Nuria Solís (Carmen), Lluis Nel Estrada (Marcos), Miguel Fernandi ‘Burilo’ (Xicu Xabel), Silvia Quesada (Ana) y Alfredo González (Antón), Nuria Dago (Cayetana ‘Tana’), David Fernández Fernández (Ástur Nel), Xandru Martino (Merche), María Cotiello (Olaya) y el propiu Castañón (Ramiru), que lleva cuatro capítulos, cola previsión d’emitir los nuevos los miércoles y domingos a les 20.30 hores.

Tampoco nun faltó la música nesti periodu. José Manuel Tejedor, La Tarrancha, L-R y Xosé Ambás, ente otros, xubieron conteníos nes sos redes sociales, mentes que Maxi Areñes tamién acompañó a la xente colos cuentos dende Piloña.

Na semeya, Zapico nel so videu últimu de 'Historia d'Asturies', entituláu 'Asturies baxo'l franquismu y na II Restauración'.