La prueba de nivel B2 d’asturianu pasa al trimestre últimu del añu

Esti xueves debería d’entamar la prueba de certificación d’asturianu adaptada al Marcu Común Européu de Referencia pa les Llingües de nivel B2, que la situación actual de crisis sanitaria obliga a aplazar. Educación asitia les feches nueves pal trimestre últimu del añu y anuncia que va activar la matriculación “nos díes próximos”.

El Boletín Oficial del Principáu d’Asturies (BOPA) afitaba ayeri les feches de los esámenes de conocimientu d’idiomes d’italianu, inglés, alemán y francés –ente'l 7 y el 17 de setiembre– ensin facer referencia al únicu de llingua asturiana, de nivel intermediu B2. Dende últimos d’abril Asturies.com trató de contautar cola Direición Xeneral d’Ordenación, Evaluación y Equidá Educativa pa conocer la situación d’esta prueba, qu’anunció finalmente a última hora d’ayeri.

“Treslladaráse al trimestre últimu, dáu’l volume elleváu d’aspirantes”, confirmó. “Los plazos pa que les 500 persones interesaes finen el procedimientu d’inscripción na prueba reanudaránse próximamente”, apuntó darréu, pa depués puntualizar “nos díes próximos”.

Na fase de pagu de tases

L’estáu d’alarma interrumpió’l procesu de matriculación na fase de pagu de tases. Dende la conseyería confirmóse que siguiría cuanndo finara’l mesmu, anque paez que col avance de les fases de la desescalada va retomase enantes.

Les primeres feches afitaes pal esperáu primer esame de certificación de llingua asturiana yeren del 21 al 29 mayu n’Uviéu. 800 persones presentaron inscripción, anque namái 500 van poder facer l’esame nesta convocatoria.

Na semeya, la Facultá de Formación del Profesoráu y Educación de la Universidá d’Uviéu, onde va desendolcase'l bloque 1 de la prueba.