Fernández Muñiz emplega ‘Asturies’ pa identificase nuna videoconferencia col ministru y los conseyeros

Asturies insistió nel Plenu del Conseyu Interterritorial del Sistema Nacional de Salud, onde hebo consensu na obligatoriedá nel usu del mázcaru, en que se tengan en cuenta l’avieyamientu de la población y la inversión na sanidá pública a la hora de compensar los gastos a les autonomíes pola pandemia de COVID-19. El conseyeru Pablo Ignacio Fernández identificóse na mesma baxo’l nome ‘Asturies’.

La sesión d’ayeri yera estraordinaria y urxente, centrada únicamente n’analizar y valorar la situación actual de la crisis sanitaria pol andanciu. Nella Asturies siguió defendiendo la mesma postura ente’l repartu de la compensación por cuenta los gastos: “Esiximos que se tenga en cuenta la población avieyada qu’hai n’Asturies, muncho más que nel restu d’España, con una enfermedá qu’afeuta sobre manera la xente mayor, y esto hai que tenelo en cuenta; asina como compensar el gran esfuerciu que se fai dende Asturies, yá dende va bastante tiempu, financiando una sanidá pública, concretamente n’Atención Primaria, con gran solidez, lo que foi una de les claves de que pudieramos lluchar contra la COVID-19 de manera afayadiza y algamar unos resultaos meyores de los qu’hubiere de trabaya d’otra manera”.

Nesti alcuentu virtual col ministru de Sanidá, Salvador Illa, y miembros del so equipu y los conseyeros tamién s’alcordó facer obligatoriu l’usu de mázcaru en sitios zarraos y naquellos abiertos nos que nun se pue garantizar la distancia mínima de seguranza de dos metros. “Hai un consensu na so importancia”, aseguró Fernández Muñiz.

El conseyeru participó na videoconferencia identificándose como ‘Asturies’, esto ye, emplegando la denominación n’asturianu del país. Nesti formatu nuevu de xuntes cada persona emplega’l so nome o, como foi esti casu, el de l’autonomía pa que los participantes identifiquen en tou momentu a la persona que tien la pallabra.