El día 25 fina’l plazu pa presentar trabayos al XXIII Concursu de Cuentos pola Oficialidá del Asturianu

La crisis sanitaria nun pue col Concursu de Cuentos pola Oficialidá del Asturianu qu’entama'l Conceyu de Bimenes. El día 25 fina’l plazu pa presentar trabayos, ún por persona, cola posibilidá per primer vegada de facelo per corréu electrónicu por cuenta l’estáu d’alarma.

Esta midida foi tomada de manera esceicional pa esta edición del veteranu concursu, que yá suma 23 ediciones. Tradicionalmente unvíense xunto con plica nun sobre al Ayuntamientu de Bimenes (pal XXIII Concursu de Cuentos pola Oficialidá del Asturianu), na direición Plaza de Miranda de l Douro, s/n, códigu postal 33527 de Martimporra, vía que sigue disponible pa la entrega, cola necesidá de que’l matasellos tenga fecha anterior al llunes, día cuando fina’l plazu pa participar.

El cuentu que se presente ha de ser de ser inéditu y ha de tar redautáu en llingua asturiana respetando les normes ortográfiques vixentes. Éstos nun deben esceder les diez fueyes, mecanografiaes a doble espaciu per una cara.

Los participantes han de presentar un orixinal del cuentu, trés copies del mesmu y otra más en CD, too ello baxo un nomatu que debe apaecer nuna plica con tolos datos personales y con un currículu con semeya. Un xuráu formáu por trés persones cualificaes y presidíu pol alcalde de Bimenes, Aitor García Corte, va decidir el ganador del concursu, en fecha entovía por confirmar, al igual que l'actu institucional d'entrega de premios.

Caltiénense los premios

El Conceyu fai l’esfuerciu un añu más de caltener los premios: 600 euros pal ganador, de 450 pal segundu premiu, y de 300 pal terceru. Hasta’l 2013 el concursu tenía sofitu económicu esternu.

El ganador del añu pasáu foi’l periodista xixonés Francisco ‘Paco’ Álvarez col cuentu ‘Rosa d’iviernu’. El segundu premiu llevólu Xaime Martínez por ‘La nieve nun ye blanco y el cuervu nun ye prietu’ y Xuan Trenor, con ‘Cavilaciones d’un home enroldáu’, recibió’l terceru.