Un videu recuerda la presencia del asturianu en series d'Antena 3 y TV3 de los años 90

La canal de YouTube 'Horros & Frixuelos' ta dirixida pol periodista Damián Barreiro.

L'avilesín nacíu n’A Estrada dedica un videu a recordar la presencia de la llingua asturiana d'una manera más o menos curiosa en dos series de televisión de los años 90 na so pieza última. Una que permanez na memoria de munchos asturianos ye la participación nel 1995 en 'Farmacia de Guardia' d'Antena 3, un ésitu d'audiencia de la época que saltó la llende del Estáu pa emitise en países tan llonxanos como China, d'un ganaderu asturianu xunto cola so vaca 'Muralla' que se desplazaba a Madrid pa protestar énte'l ministeriu nel capítulu 'Un problema de la leche'.

En Catalunya naquellos años en TV3 emitíase tamién una serie d'humor entitulada 'Oh! Espanya' con personaxes que percorríen toles comunidaes autónomes. Nel episodiu dedicáu a Asturies apaecíen munchos tópicos, pero la llingua emplegada polos asturianos yera l'asturianu.

Entrevistes

Barreiro tamién incorporó recién a la so canal un espaciu d'entrevistes entituláu 'Cafetín con pingarates', creáu p'analizar dende una óptica asturiana la situación xenerada pola pandemia de COVID-19 y tratar cuestiones del ámbitu de trabayu del convidáu. Xosé Antón González Riaño, Faustino Zapico, Xune Elipe, Rodrigo Cuevas, Lluis Nel Estrada o Laura Marcos son dalgunes de les persones que participaron.

Na semeya, l'actor Adriano Prieto faciendo'l personaxe de Toño en 'Farmacia de Guardia'.