Zimmerman protagoniza una videoconferencia sobre la historia del nacionalismu asturianu

L'estauxunidense, autor de 'Faer Asturies. La política llingüística y la construcción frustrada del nacionalismu asturianu (1974-1999)', participa na actividá en llinia de La Llegra.

El títulu de la videoconferencia del historiador Patrick W. Zimmerman va ser 'Historia del nacionalismu asturianu (1974-1999)'. Nacíu en California nel añu 1981, dedicó la so tesis doctoral a analizar el nacionalismu asturianu cola investigación 'Domesticated Nationalism: Asturian Regionalism and Cultural Politics since the Spanish Transition, 1974-2008' cola que se doctoró nel 2011 pola Carnegie Mellon University de Pittsburgh (Pennsylvania).

Esta tesis servería de base pal llibru 'Faer Asturies. La política llingüística y la construcción frustrada del nacionalismu asturianu (1974-1999)', asoleyáu por Ediciones Trabe nel 2014. Esta tarde l'agora investigador del Center for Equitable Policy in a Changing World de Seattle (Washington) va coneutar con Asturies y tol mundu al traviés de la canal de La Llegra en YouTube a les 18.30 hores xunto col historiador Rafael Rodríguez Valdés, que va conducir l'actu dende'l so llar en Xixón.

"Mui interesante, nesti tiempu d'incertidumbre política, social y económica analizar esos momentos pa entender, cola perspeutiva del tiempu, aquelles realidaes de cara a pensar nel futuru", apunten dende esti espaciu soberanista uvieín.