“La fase 0 de la desescalada nun tuvo impautu nengún sobre la enfermedá”, confirma Salú

“Pudimos llegar a la fase 1 porque llevamos trés selmanes con una cantidá de númberos de casos nuevos mui baxu, que se caltuvo estable, ensin biltos nuevos”, esplicó Ismael Huerta, xefe del Serviciu de Vixilancia Epidemiolóxica. “La fase 0 de la desescalada nun tuvo impautu nengún sobre la enfermedá”, confirmó.

La Conseyería de Salú apuntó esta mañana que la situación actual na que ta la pandemia de COVID-19 débese “al bon comportamientu de la población asturiana en toda esta fase de confinamientu, que nos permitió caltener una situación de niveles mui baxos de contaxos y qu’esperamos siguir manteniendo”. Agora, en fase 1, “ponemos en marcha sistemes de vixilancia munchos más intensos pa intentar deteutar tolos posibles casos”, cola fin de “ponelos n’aisllamientu y facer una intervención nel so entornu pa controlar mui bien tola posibilidá de contaxu”.

Huerta destacó tamién que “la situación que tenemos caltúvose bastante estable nestes trés selmanes últimes y eso quier dicir que la fase 0 de la desescalada nun tuvo impautu nengún sobre la enfermedá. “Si consiguimos siguir manteniendo esi nivel tan baxu de contaxos vamos poder siguir progresando”, finó.

Avisu de Barbón

A última hora d’ayeri, primer día de fase 1, el presidente Adrián Barbón espublizó un mensaxe na rede social Twitter amosando’l so esmolecimientu tres dar un paséu. “Que salgamos y consumamos, nun pue ser baxando les defenses”, en referencia a l’actitú de parte de la población nes terraces de los pocos chigres qu’abrieron.

El llavianés llama caltener la distancia, usar mázcaros y llavar les manes de manera frecuente. “Si siguimos asina, en diez díes, confinaos otra vuelta”, sentenció darréu en respuesta a un usuariu.