Iniciativa pol Asturianu axunta a los partíos nel Día de les Lletres con una llectura de poemes

La organización pretende dar una imaxen d’unidá respecto al idioma con representantes de diferentes fuercies polítiques nun momentu tan complicáu. El presidente Barbón y diputaos y diputaes de PSOE, PP, Podemos, Ciudadanos, Izquierda Xunida y FORO participaren na iniciativa.

Esti añu pola complicada situación d’andanciu de coronavirus nun se pudo celebrar na Xunta Xeneral del Principáu l’actu d’homenaxe de la Cámara a les Lletres Asturianes. Por ello, Iniciativa pol Asturianu invitó a representantes de diferentes fuercies polítiques con representación institucional nel Parlamentu asturianu y nes Cortes a grabar un videu lleendo dalguna obra lliteraria n’asturianu.

Dende Iniciativa pol Asturianu pretenden con esta llectura de poemes llograr una imaxen d’unidá respeuto al idioma con representantes de diferentes fuercies polítiques nun momentu tan complicáu.

A la invitación d’Iniciativa unierónse Adrián Barbón (presidente del Gobiernu del Principáu d’Asturies y diputáu pola FSA-PSOE na Xunta Xeneral), Sofía Castañón (diputada nel Congresu por Xuníes Podemos), Roberto García (diputáu nel Congresu pola FSA-PSOE), María Fernández Álvarez (senadora por Asturies pola FSA-PSOE),  Álvaro Queipo (diputao na Xunta Xeneral por el PP), Lorena Gil (diputada na Xunta Xeneral por Podemos Asturies), Armando Fernández (diputáu na Xunta Xeneral por Ciudadanos), Ángela Vallina (diputada na Xunta Xeneral por Izquierda Xunida d’Asturies), Adrián Pumares (diputáu na Xunta Xeneral por Foro Asturias), Mercedes Otero (senadora por Asturies pola FSA-PSOE), Rafael Palacios (diputáu na Xunta Xeneral por Podemos Asturies),  Ovidio Zapico (diputáu na Xunta Xeneral por Izquierda Xunida d’Asturies), Pedro Leal (diputáu na Xunta Xeneral por Foro Asturias), Nuria Rodríguez López (diputada na Xunta Xeneral por Podemos Asturies) y Daniel Ripa (diputáu na Xunta Xeneral por Podemos Asturies).

Iniciativa pol Asturianu quier cellebrar d’esta manera esti inusual Día de les Lletres faciendo un homenaxe a la nuesa lliteratura y a los nuesos escritores con representantes de diferentes organizaciones polítiques.