¡Yá somos más de 22.000!

La Conseyería d'Educación y Ciencia fizo públicos el pasáu día 3 d'avientu los datos correspondientes a la matriculación nes asignatures de Llingua Asturiana y Gallego-Asturianu.
Nellos podía vese una xuba del 9% nos estudiantes de les llingües propies d'Asturies nes sos diferentes estayes. En concretu fálase de más de 21.700 alumnos d'Asturianu y 459 de Gallego-Asturianu.
Asina, nel cursu 2006-2007 había 19.753 alumnos matriculaos (19.514 na rede pública y 239 na rede concertada), demientres qu'al siguiente cursu la cifra xubió hasta los 21.409 estudiantes (20.654 na rede pública y 755 na concertada), pa llegar esti añu a los 21.748 (21.119 nos centros públicos y 629 nos concertaos). Sicasí'l calter voluntariu de l'asignatura fai que'l porcentaxe total d'alumnos na Educación Primaria seya del 55'3% na rede pública. Esta cifra baxa enforma si nos referimos a la rede concertada o a otres estayes educatives como la Educación Secundaria y el Bachilleratu, onde se plantega como optativa.
La única estaya educativa na que la llingua asturiana nun tien entá presencia curricular ye la Educación Infantil, momentu perimportante pa l'alquisición de la llingua o'l caltenimientu de la mesma nel casu de los neños y neñes que tienen al asturianu o la fala como llingües maternes.