Un camín hacia la “normalidá nueva” que va contar con cuatro fases

Pedro Sánchez anunció los planes del Gobiernu estatal pa proceder a la desescalada, que va tener llugar nun plazu d’ochos selmanes, hacia lo que nomó “normalidá nueva’. Esti procesu de cuatro fases va ser idénticu en toles autonomíes anque a diferente ritmu según les provincies o islles, cola posibilidá d'allargales o retroceder a una anterior nel casu de que nun se cumplan los indicadores.

La fase 0 va principar el llunes, anque’l sábadu yá se podrá salir a dar un paséu y prauticar deporte en condiciones entovía por conocer. Ésta va ser de preparación y va durar hasta’l domingu 10, con permisividá pa dalgunos negocios pa trabayar con cita previa o a los ciudadanos pa dir a la güerta, como demandaba Asturies.

El 11 entraría la fase 1 nel casu de que les provincies correspondientes cumplan colos indicadores del panel afitáu pol Executivu estatal sobre l’estáu de la pandemia de COVID-19 nel territoriu marcáu, nesti casu les provincies o les islles. Nun se descarta que, nel casu de la esistencia de datos mui diferentes dientro d’una mesma provincia, éstes puedan dir tamién a diferente ritmu, dalgo que deberán solicitar les autonomíes.

Nesta fase va poder abrir el pequeñu comerciu, la hostelería va poder trabayar les terraces al 30 por cientu y los hoteles y apartamentos turísticos funcionar, anque ensin zones comunes. Otra demanda d’Asturies, como l’entamu de mercaos al aire llibre con productos agroallimentarios, tamién se permite.

Movimientu ente territorios, más allá del 25 de xunu

La pesca deportiva, tamién reclamada pol presidente Adrián Barbón, podrá facese na fase 2, a la que se llegaría, si se cumplen los indicadores, el 26 de mayu. Nésta va ser posible’l desplazamientu a la segunda residencia, siempre dientro de la provincia o islla, los chigres van poder abrir los sos llocales con midíes de prevención, y cines y teatros a un 30 por cientu d’aforu

El 10 de xunu entraría la tercera y fase cabera, na que los ciudadanos verán flexibilizada la movilidá xeneral dientro de la provincia o islla. Les restricciones d’aforu serán amenorgaes y los pubs y discoteques podrán abrir al 30 por cientu.

La “normalidá nueva”, como la calificó Sánchez, llegaría’l 22 de xunu. Nesi momentu sería posible la movilidá ente provincies y islles que cumplan colos indicadores afitaos, anque lo previsible ye que non toos lleguen a esti puntu al empar. Nel casu de que’l control de la epidemia nun evolucione como s’espera, ye posible que la fase nel que s’alcuentre s’amplíe nel tiempu o, inclusive, retroceder a l’anterior.

Semeya obra de Pool Moncloa/Borja Puig de la Bellacasa.