Collantes pon una conferencia sobre'l republicanismu n'Asturies nel sieglu XIX

El Llar La Llegra entama esta actividá en llinia.

L'historiador Sergio Sánchez Collantes va poner una conferencia esta tarde centrada nel so llibru 'El pueblo a escena. Republicanismos y tradición democrática en la Asturias del siglo XIX', trabayu ganador del XXIII Premio de Investigación Juan Uría Ríu asoleyáu l'añu pasáu pol Real Instituto de Estudios Asturianos (RIDEA) y presentáu na so sede esti xineru. Nel mesmu "descúbrenos, ente munchos otros fechos, un poco reconocíu puxu republicanu de la capital del país", espliquen los organizadores del eventu, que va principiar a les 19.30 hores na so canal de YouTube.

Tamién va participar nel eventu Rafael Rodríguez Valdés, historiador que se va encargar de presentar a Sánchez Collantes y de conducir l'actu. Les persones que sigan en direuto la conferencia van tener la oportunidá de treslladar custiones al autor tres una intervención na que va repasar "dalgunes de las principales aportaciones d'Asturies a la tradición republicana y democrática del sieglu XIX", anuncia'l xixonés.