Los positivos confirmaos superen la cifra de 2.500

Sigue'l descensu de persones ingresaes en planta por COVID-19, 25 esti xueves.

Asturies rexistra 2.509 casos positivos confirmaos, con datos actualizaos a les 20 hores d'ayeri, dende l'entamu del andanciu. Nes 24 hores últimes la cifra medró en 56, cantidá superior al miércoles (34) y asemeyada a la del martes (54).

Hasta'l momentu llévense feches 43.927 muestres pa determinación de la COVID-19, de les que 34.425 son por PCR y 9.502 por test d'anticuerpos. Na última xornada procesáronse 1.129 pruebes de los primeros y 1.102 de los segundos, esto ye, un total de 2.231.

De les 2.509 persones cola enfermedá causada pol coronavirus SARS-CoV-2 morrieron 231. A la llista de finaos sumáronse ayeri 8, 4 menos que nel día anterior.

Les meyores cifres d'estos díes son el descensu de pacientes en planta y na UCI. Nes trés xornaes últimes pasóse de 353 a 290 persones ingresaes, mentes qu'en cuidaos intensivos hai 50, 3 menos que'l miércoles.