ALLA y Universidá d’Uviéu deciden suspender esta edición de la UABRA

La úndecima edición de la Universidá Asturiana de Branu (UABRA) nun va celebrase esti añu. L’Academia de la Llingua Asturiana (ALLA) y la Universidá d’Uviéu tán acabantes de decidir la so suspensión al considerar prioritario “garantizar la salú coleutiva del pueblu asturianu” nesti contestu de crisis sanitaria pol coronavirus.

Magar que los cursos de Cangas tuvieran previstos pa la primer quincena d’agostu, lo que podría dar a entender que “entá podíen dase les condiciones alministratives y normatives afayadices pa la so organización”, dambes instituciones optaron pola suspensión cola idea de retomar la so organización l’añu qu’entra. “La Universidá d’Uviéu, l’Academia de la Llingua Asturiana y el Conceyu de Cangas del Narcea quieren asoleyar el so compromisu na continuidá de la UABRA y l’enfotu en celebrar una edición nueva nel branu de 2021”, aseguren.

“El compromisu dirixíu a garantizar la salú coleutiva del pueblu asturianu ye prioritariu”, argumenten les entidaes qu’entamen esta iniciativa compuesta por 7 cursos –2 d’asturianu, 1 de gallego-asturiano y 4 d’afondamientu cultural y llingüísticu–, conferencies, conciertos y esposiciones mientres dos selmanes con epicentu na Escuela-Hogar, na que tomen parte 150 persones ente alumnáu, profesoráu, collaboradores y personal llaboral. “Persabiendo que la UABRA ye una propuesta educativa de primer orde, con especial impautu na ufierta formativa añal n’asturianu y en temes y perspeutives d’Asturies, dambes instituciones llamenten fondamente la perda de la edición d’esti añu. Sicasí, igual Universidá qu’Academia, quixeron afitase xuntes nesti determín de collaborar activamente cola solución social definitiva de la crisis sanitaria abierta anguaño”, apunten.