Aumenten los positivos y el númberu de finaos

Depués de rexistrar la cifra más baxa de tol estáu d'alarma, los casos nuevu aumenten a 54, mentes qu'hebo que llamentar 9 muertes.

Asturies nun rexistró bones cifres na xornada d'ayeri. Los datos sobre la pandemia de COVID-19 daos pola Conseyería de Salú, actualizaos a les 20 hores, tornaron a amosar un aumentu nel númberu de positivos y de finaos.

54 foron los casos nuevos, cifra que triplica los 17 del llunes, pa colocar el total en 2.419. Mentes, les muertes ascendieron a 9, 7 más que'l llunes, polo que 211 persones yá perdieron la vida n'Asturies pola enfermedá causada pol coronavirus SARS-CoV-2.

El númberu de pruebes feches ayeri tornó a superar los dos millares, en concreto 2.152: 790 muestres pa determinación de la COVID-19 por PCR (31.851) y 1.362 por test d'anticuerpos (7.313). Menguó'l númberu de pacientes en planta en 19 (344) y aumentó'l que ta na UCI en 3 (53), mentes qu'ayeri hebo 26 curaciones que permiten sumar un total de 642 dende l'entamu del andanciu.