La música y la lliteratura, campos onde se concentra la mayoría de proyeutos n’asturianu de ‘Asturies, Cultura en Rede’

Yá se conoz el mediu centenar de propuestes esbillaes pa la iniciativa ‘Asturies, Cultura en Rede’, que va amosar dende’l 4 de mayu el trabayu creativu d’asturianos de cinco campos artísticos nuna plataforma web. La música y la lliteratura concentren la mayor parte de proyeutos seleicionaos en llingua asturiana.

La comisión de valoración de les propuestes de ‘Asturies, Cultura en Rede’, coordinada pola Sociedá Pública de Xestión y Promoción Turística y Cultural, aconceyó esta mañana de manera virtual a les 9 hores. D’esa xunta telemática salió la escoyeta de los 50 proyeutos que van formar parte del proyeutu entamáu nel contestu de crisis sanitaria pola pandemia de COVID-19 pa sofitar el texíu cultural asturianu y dar a conocer el llabor de creadores, artistes y investigadores del país a la ciudadanía.

L’asturianu, amás de la presencia nel nome de la iniciativa, protagoniza numberoses propuestes presentaes, siendo la música y la lliteratura los campos onde se concentren la mayor parte d’ellos. Asina, Alfredo González va desendolcar el proyetu ‘El camín de la espluma’, José Martínez Álvarez va amosar el procesu de creación artística d’Ún de Grao, Rubén Bada ‘Por muncho trabayo que cueste, la tradición nun ruempe’ y Leticia González ‘Cantar, crear, tocar la pandereta’.

Mentes, los escritores Gonzalo González Barreñada va esplicar ‘Cómo naz un poema’, Inaciu Galán va centrase en ‘Ventanes poétiques’, Milio Ureta na ‘Dramaturxa y Escenificación del poemariu ‘Poemes del Amor Simétricu’’ y el dibuxante Ruma Barbero va presentar ‘Faciendo tebeos’. N’artes escéniques atópense tamién proyeutos como ‘Pallabres de contrabando’, d’Alicia Andrés Ramos, o ‘Nelón con-fináu’, d’Inmaculada Rodríguez García; n’artes plástiques ‘Cómo facer un cómic que trate de la Memoria Democrática’ d’Alberto Vázquez García; y en cine ‘Nestos díis’, de Pablo Casanueva.

Tolos artistes seleicionaos tienen hasta’l llunes pa unviar la so pieza audiovisual. Caún va recibir 250 euros pola cesión de derechos de les sos obres, que se van a incorporar a la plataforma web ‘Asturies, Cultura en Rede’, cola previsión de que tea activa’l 4 de mayu, amás d’en llugares públicos, edificios y otros tipos de medios o soportes físicos o dixitales del Gobiernu.