La música ye’l sector con más propuestes pa ‘Asturies, Cultura en Rede’, que recibe un total de 140

Esti miércoles va dase a conocer el mediu centenar de proyeutos que va formar parte de la iniciativa ‘Asturies, Cultura en Rede’, entamada pola Conseyería de Cultura, Política Llingüística y Turismu nesti constestu de crisis sanitaria pola pandemia de COVID-19. Recibiéronse un total de 140 propuestes, cola música, con 38, y les artes plástiques, con 37, como campos mayoritarios.

‘Asturies, Cultura en Rede’, que ta organizando la Sociedá Pública de Xestión y Promoción Turística y Cultural, zarró ayeri el plazu d’entrega de propuestes. Esti proyeutu consiste na creación de conteníos pa una plataforma web na que la ciudadanía pueda conocer el métodu de trabayu d’estos creadores, investigadores y artistes asturianos, y dalos a conocer, nestos díes de confinamientu, cola previsión de que tean disponibles dende’l 4 de mayu.

Los vídeos van distribuyise por campos artísticos, diez por caúna de les cinco afitaes nes bases: música, con 38 propuestes presentaes; artes plásticas, con 37; artes escéniques, con 30; lliteratura, con 18; y cinematografía, con 17. Sicasí, la organización esplica que dalgunes d’elles podrían encaxar en más d’una d’estes árees.

Una comisión de valoración va esbilar mañana les 50 que pasen a formar parte de ‘Asturies, Cultura en Rede’. Una vegada conocíu’l resultáu, los creadores tendrán cinco días de plazu, hasta’l llunes, pa entregar una pieza audiovisual “qu'amuese'l so procesu creativu acompañáu de dalguna amuesa práutica del mesmu”.

“D’esti mou, ‘Asturies, Cultura en Rede’ podrá ufiertar un percorríu audiovisual pa descubrir la cultura asturiana, dende dientro, y de la mano de los sos creadores”, esplica la organización. La conseyería va abonar 250 euros por caún de los proyeutos por poder facer usu de los derechos d’esplotación de les pieces audiovisuales, lo que va ayudar “a dinamizar el sector” cultural que, col so llabor, ta faciendo una “valiosa aportación nesta fase de la pandemia del coronavirus”.