“Asturies ta en condiciones d’entamar un camín de desconfinamientu distintu”, entiende Barbón

El presidente d’Asturies, Adrián Barbón, punxo enriba de la mesa na videoconferencia con Pedro Sánchez y los dirixentes autonómicos delles reflexones sobre un procesu de salida por zones de la reclusión pola pandemia de COVID-19. “Asturies ta en condiciones d’entamar un camín de desconfinamientu distintu”, apuntó, plantegando la posibilidá de salíes a facer deporte o a la güerta.

La nomada desescalada foi’l tema principal del alcuentru telemáticu dominical ente presidentes, un día depués de la nueva anuncia del Gobiernu estatal de facer una prórroga del estáu d’alarma, la tercera, hasta’l 10 de mayu. Ésta va ser menos estricta, yá que per primer vegada va permitise que la reciella pueda salir un tiempu determináu de casa en condiciones entovía por conocer.

“Asturies ta en condiciones d’entamar un camín de desconfinamientu distintu, que nun tien por qué ser homoxeneu dende’l conxuntu del Estáu, que dea respueta a la situación”, apuntó tres la videoconferencia. Asina, entiende que nel país, “pola so situación, al igual qu’otres comunidaes del noroeste, pol númberu d’afeutaos y pola dispersión de la población, podríemos aniciar una desescalada distinta a la que tienen nos grandes centros onde más contaxos hai nestos momentos y mayor númberu de finaos”.

Recibió como bona noticia la salida de la reciella y plantegó “que se regulen les salíes a facer deporte o a atender la güerta, dalgo mui típico n’Asturies”. Otra manera, quixo mandar un mensaxe d’esperanza magar que “la batalla sanitaria nun ta ganada. Nun debemos baxar la guardia porque quedan entovía selmanes dures, pero empezamos a ver la lluz al final del túnel”.

Semeya obra d'Armando Álvarez.