La 2 estrena un documental sobre Pidal

Xulio Concepción participa nuna cinta con delles escenes rodaes n'Asturies.

‘La historia oculta en las palabras. Ramón Menéndez Pidal', dirixíu por Sonia Tercero, va estrenase esti domingu a les 21.30 hores dientro la serie de documentales 'Imprescindibles' qu'emite La 2. Esti trabayu "percuerre l'aventura vital y profesional" del consideráu padre de la filoloxía hispánica moderna "pa demostrar la esistencia d'una llarga tradición oral de la nuesa épica medieval, al traviés de los romances", un llabor "a la que dedicó toda una vida, recoyendo testimonios direutos nes zones más remotes de la xeogafía española y americana, creando, con familiares y amigos, un llaboratoriu humanísticu que dará como fruto 'El Archivo del Romancero'".

El documental entrevista a espertos y investigadores como Antonio Cid (presidente de la Fundación Menéndez Pidal), Sara Catalán (bisnieta de Menéndez Pidal), Pedro Álvarez de Miranda (miembru de la RAE), Carmen Iglesias (direutora de la Real Academia de la Historia), Luis García Montero (direutor del Instituto Cervantes), Inés Fernández Ordoñez (miembru de la RAE), Jon Juaristi (caderalgu de la Universidad de Alcalá de Henares), Pere Ferré (caderalgu de la Universidade do Algarve), amás de Concepción, filólogu miembru del Real Instituto de Estudios Asturianos (RIDEA). Asturies tien un ampliu pesu nes llocalizaciones de la cinta, con escenes nel Torrexón de Peñerúes, Payares o Llanes, onde bailla'l Grupu del Pericote de les Fiestes de la Virxe de la Guía.

Autor de 'El dialecto leonés'

Nacíu n'A Coruña nel 1869 fíu d'asturianos y criáu n'Asturies hasta los 7 años, Menéndez Pidal ye l'autor de 'El dialecto leonés' (1906), primer estudiu filolóxicu integral sobre'l dominiu llingüísticu asturlleonés. Nesi estudiu consagra la idea d'un dominiu románicu autónomu que devasa históricamente les llendes polítiques d'Asturies y la de la partición del asturlleonés en trés grandes rexones dialeutales, esto ye, la occidental, la central y la oriental, asumiendo, sicasí, una base común.

Na semeya, un momentu del documental nel que se ve la estación de tren de Payares, llugar d'orixe del padre de Menéndez Pidal onde'l filólogu pasó llargues temporaes.