Podemos propón que la segunda canal de TPA emita conteníos culturales fechos n’Asturies y potencie l'idioma

La situación que ta viviendo’l sector cultural por cuenta les restricciones pol estáu d’alarma pola pandemia de COVID-19 esmolez a Podemos. La formación política propón al Gobiernu delles midíes de sofitu, ente la que destaca l’apertura de la segunda canal de TPA pa conteníos d’esti calter, potenciando “les iniciatives en llingua asturiana y el doblaxe de conteníos audiovisuales”.

“Cuando acabe la reclusión les nueses instituciones deben garantizar que la cultura siga presente nes vides de tola ciudadanía”, apunta Podemos nuna campaña que ta moviendo en redes sociales. Ente elles destaca l’usu del A8, destinada anguaño básicamente a emitir la programación de l’A7 con una hora de retrasu o plenos en direuto de la Xunta Xeneral, como “canal d’emisión de conteníos culturales fechos n’Asturies”.

“Toles actividaes culturales que nun puedan facese por restricciones posibles d’aforu podrán grabaese y retrensmitise por esta canal”, apunten. D’igual forma, rescamplen que “nesta iniciativa habría que potenciar les iniciatives en llingua asturiana y el doblaxe de conteníos audiovisuales”.

Otres propueste de Podemos pa sofitar el sector cultural asturianu son “la merca de llibros pa les biblioteques públiques d’Asturies al traviés de les llibreríes de proximidá y editoriales asturianes”, y “caltener les convocatories culturales previstes, axilizar la espublización de les qu’entovía nun foron convocaes y flexibilizar les yá resueltes”.