Sánchez Vicente: “Los que quieran escribir n’asturianu deberíen saber casi de memoria los nuesos clásicos”

El II Premiu Nacional de Lliteratura Asturiana, qu’entrega l’Academia de la Llingua Asturiana en reconocimientu d’una trayeutoria lliteraria y el so llabor normalizador, ye pa Xuan Xosé Sánchez Vicente (Xixón, 1949). Dende’l so llar, con esmolecimientu pola situación pol coronavirus, fala con Asturies.com sobre'l so trabayu creativu y les nueses lletres.

¿Qué supón pa usté esti reconocimientu?

Un agradecimientu grande, en primer llugar: a toos, al xuráu, a l’Academia, a los mios llectores. Y, por supuestu, préstame muncho, muncho.

Xuan Bello y usté son los dos escritores que llevaron el Premiu Nacional de Lliteratura, pero ente los candidatos nestes dos ediciones apaecen los nomes d’Antón García, Roberto González-Quevedo, Berta Piñán, Lourdes Álvarez y Adolfo Camilo Díaz. ¿Ta la nuestra literatura nun nivel superior al de la implantación social de la llingua?

Pezme que sí. Hai un báramu notable d’escritores, pero la difusión y el prestixu social de la lliteratura (el so desconocimientu, pa nun dar llugar a males interpretaciones) nun se correspuenden col interés de la producción lliteraria.

¿Qué queda anguaño del autor de ‘Camín de Señardaes’?

Aparte les pates, la cabeza, les oreyes..., yo creo que’l tonu emocional y la forma de ver el mundu siguen siendo los mesmos. Lo que desapareció fueren los poemes espresamente políticos, afalaos pola coyuntura. Recuerdo, por cierto, que dalgún d’ellos asoleyóse d’estrenu nun ‘periódicu’ (yera a ciclostil) de partíu, del PSPA, en concreto.

Ye’l responsable d’una de les reediciones de l’antoloxía de Caveda que dio a conocer los nuesos clásicos a una xeneración. ¿Piensa que los autores asturianos anteriores al sieglu XX tienen un nivel lliterariu relevante?

Tiénenlu, pergrande. A Marirreguera entá nun lu superó naide. Debíen lleese más nos primeros niveles de llectura y, dende llueu, tienen que sabelos casi de memoria los que quieran escribir n’asturianu.

¿Ye optimista sobre’l futuru del asturianu en xeneral y de la so lliteratura en particular?

Medianamente. Les dificultaes son grandes, la voluntá de les instituciones, roína. Y eso que s’avanzó muncho. Pero ye que’l puntu de partida taba mui per baxo la cota cero, na sesta galería. En tou casu, hai que seguir esbrexando.

¿Considera una aciertu la creación d’esti premiu por parte de l’ALLA?

Aparte de que sí, ¿qué quier que-y diga? Lo d’asoleyar una antoloxía del autor como parte del premiu ye una gran idea. Dalguna otra cuestión...

La so entrega va retrasase finalmente a la seronda por cuenta la pandemia pol coronavirus. ¿Cómo ta viviendo la situación?

Fastidiáu, pol retrasu, que yá tenía preparáu’l discursu y too; pero, sobre too, pola situación, pola causa.

¿Ta sacando tiempu pa escribir nel confinamientu?

Menos del que podía pensase. Curiosamente, cuando ún se xubila descubre que cada día tien menos tiempu, en primer llugar porque se tomen les coses con más vagar, dempués porque tol mundo tira d’ún pa mil coses. Col confinamientu pasa igual, y, per otru llau, la cabeza nun ta munches vegaes pa pensar n’otres coses que nun sean la situación, los amigos, la familia... Pero, con tou, daqué se fai.

-Repasando la so bayurosa creación lliteraria, ¿qué títulos son a los que-yos guarda más apreciu?

Ensin que l’orde signifique preferencies: ‘No miréis al mar’ (novela), ‘As de corazón/es/y/es’, ‘De les hores y les memories’, ‘Camín de señardaes’ (por dalgunos poemes, una bona mozada, y por ser l’entamu nun sólo d’un procesu personal, sinón tamién colectivu), ‘Retrato de desposados con panamá a su frente’ (novela); y toi mui contentu de dalgunos ensayos y llibros d’investigación, por exemplu, ‘Les producciones clasicistes d’Antón de Marirreguera’, ‘El hilo de Ariadna’, y, por supuestu, los refraneros, los diccionarios y los llibros de mitoloxía (éstos, como los refraneros, a comuña con Xesús Cañedo Valle).

¿Qué referentes tuvo a la hora d’entamar a escribir?

Evidentemente, nun podía ser d’otra forma, la lliteratura castellana y parte de la francesa y inglesa. En poesía, fundamentalmente, el Sieglu d’Oru y el 27. Y lluegu, los clásicos asturianos.

Como fundador de Conceyu Bable xunto con autores que son referentes de toda una xeneración d’escritores, ¿cómo ve a les nueves xeneraciones d’autores n’asturianu?

Espoxigando y con xente yá consagrao.

¿Piensa que les redes sociales y les nueves tecnoloxíes son un ecosistema afayadizu pa la creación, tresmisión y consumu de literatura?

Pa la propaganda pue ser, pero lo que nun sea la llectura en papel… En fin, a lo meyor ye la vieyera. Y, sobre too, lo que nun sean muches llinies y munches páxines... A min la lliteratura de sascudida de gallu, la verdá nun me convence.

Pa cabu y agradeciendo-y les respuestes, ¿piensa que l’alministración y la sociedá asturiana saben valorar la bayura que supón la lliteratura asturiana?

Reconozo los esfuerzos, en xeneral, de tolos responsables de la Oficina de Política Llingüística. Y, nesta llexislatura, tamién de la conseyera, que fai una cosa que ningún cargu políticu fexo hasta agora: falar n’asturianu, que val más que mil anuncios. Pero, de ehí pa enriba, en xeneral y a lo llargo la historia...