Los primeros datos tres la declaración del estáu d’alarma pol coronavirus afiten un aumentu del paru en 4.511 persones

Asturies tornó esti marzu a cifres de paru d’hai dos años, frayando tamién la tendencia iniciada n’ochobre del 2013 de descensos interañales nel númberu de desemplegaos. El total de demandantes de trabayu asítiase en 77.451 persones tres sumar 4.511 el mes pasáu pola situación provocada pola pandemia de coronavirus.

L’aumentu del paru nel país foi del 6,18 por cientu, cuando la media estatal asitióse nel 9,31 por cientu. La ciudá autónoma de Melilla convirtióse nel únicu llugar onde baxó’l desemplegu, un 1,38 por cientu, siendo la Comunidad de Madrid onde menos xubió, un 3,08 por cientu, y onde más Andalucía (17,18 por cientu), Navarra (9,98 por cientu) y la Comunitat Valenciana (9,71 por cientu).

En términos interañales, Asturies rexistra 2.327 paraos más, lo que significa un 3,10 por cientu, siendo la media estatal del 9,01, con aumentos en tolos territorios. Les peores cifres son les d’Andalucía (17,39 por cientu), Illes Balears (14,62 por cientu) y Navarra (10,90 por cientu), tando nel llau contrariu Melilla y Ceuta (0,36 y 1,07 por cientu), Galicia (2,13 por cientu) y Murcia (2,42 por cientu).

Según los númberos facilitados pol Serviciu Públicu d’Emplegu del Principáu d’Asuries (SEPEPA), l’aumentu del paru correspuende mayoritariamente a persones que finaron contratu o vieron rescindida la so relación llaboral de manera anticipada. Les cifres medraron sobre manera nes dos selmanes últimes del mes, tres decretase l’estáu d’alarma pola pandemia de coronavirus SARS-CoV-2, siendo l’únicu sector que se salvó d’esta situación el primariu, esencial pa caltener l’abastecimientu d’alimentos.

La incidencia de la crisis sanitaria obsérvase tamién na evolución de la contratación, que desciende hasta 18.904. En números absolutos, son 6.437 menos que en febreru (25,40 por cientu).

No que respeuta a l’afiliación a la Seguridá Social ésta baxó’l mes pasáu’l 0,96 por cientu, perbaxo del promediu estatal, hasta asitiase en 359.525 cotizantes, lo que supón 3.499 persones n’alta menos.

Descensu de les persones en planta por COVID-19

No que respeuta a los datos últimos sobre la COVID-19, correspondientes a les 20 hores d’ayeri, destaca’l descensu de pacientes en planta, con 9 menos al pasar de los 318 del martes a 309. N’UCI aumentaron en 4, pa pasar a tener 76, y hebo 26 curaciones, asitiándose’l total en 135.

No que respeuta a les muertes hebo que llamentar 6 más, algamándose yá 69 mientres l’andanciu convertíu yá en pandemia. Los positivos, 1.384, baxaron en comparanza col martes: 62 casos más.