El númberu de positivos nel Estáu supera los 100.000 y n’Europa ta cerca de los 500.000

Les cifres de la pandemia de coronavirus SARS-CoV-2 siguen aumentando día a día. Nel Estáu yá se superaon los 100.000 positivos, asitiándose’l total en 102.136 –de los que 1.322 correspuenden a Asturies–, mentes que n’Europa la cifra ta averándose a 500.000 y nel conxuntu del planeta, a 800.000.

Los datos del Ministeriu de Salú, que son los resultantes de recoyer los aportaos poles comunidaes autónomes el día anterior colos númberos esistentes a les 20 hores, dexaron güei un saborgu negativu. A pesar de que paez que la curva ta menguando, ayeri España vivió’l día con más muertes dende l’entamu del andanciu convertíu en pandemia: 864 más pa colocar el total en 9.053.

Amás, superóse la barrera de los 100.000 positivos de COVID-19, colocándose l’estáu como’l terceru con más casos nel mundu. Lidera esta llista agora Estaos Xuníos, con 189.000 afeutaos, siguíu d’Italia, con 105.000, tando tres d’España China con 82.000, país d’orixe del coronavirus onde la situación paez yá estabilizada.

N’Europa’l númberu de casos ye de 450.000, con Alemaña con 61.000, y Francia, con 52.000, como estaos más afeutaos tres Italia y España. A nivel global, tán confirmaos 754.000 positivos.

Asturies, con una incidencia acumulada de 105,59

Los datos d’ayeri n’Asturies, onde les espeutatives de recuperación son bones, les cifres foron asemeyaes a los de díes anteriores. El númberu de positivos nuevos foi de 86, p’algamar el total de 1.322, y el de finaos foi de 8, llamentándose hasta’l momentu 63 muertes por COVID-19.

Les curaciones tamién aumentaron, con 19 persones que superaron la enfermedá del coronavirus SARS-CoV-2, alcanzando asina 109. Los pacientes n’UCI son 72 (11 más) y en planta 318 (12).

La incidencia acumulada de COVID-19 nos 14 díes últimos ya agora n’Asturies de 105,59 casos por cada 100.000 habitantes –el miércoles pasáu yera de 77,84 –, mui lloñe de los focos principales d’infeición: La Rioja (486,43), Comunidad de Madrid (363,22) y Navarra (322,68). Les comunidaes autónomes peninsulares con meyores datos son la Región de Murcia (61,52), Andalucía (65,76) y la Comunitat Valenciana (103,84).

Na imaxe, mázcares pa protexese de contaxos distribuyíes pol Ministeriu de Sanidá a les comunidaes autónomes. Semeya de Pool Moncloa.