El xuegu '¿Cuála ye?' va contar con 750 entrugues

La campaña de micromecenalgu pa la edición del primer xuegu de mesa d'adultos n'asturianu recaudó un total de 7.066 euros.

Pensáu nun primer momentu pa contar con 600 entrugues, la bona respuesta de la xente va permitir a Acuto Xuegos poner na cai un '¿Cuála ye'? con 750 preguntes sobre Asturies y la so cultura n'asturianu. La idea inicial yera algamar 4.500 euros pa facer realidá'l proyeutu, pero la recaudación de 2.500 euros más de lo programao lleva a disponer finalmente d'un divertimentu muncho más completu.

170 foron les persones que participaron na campaña de micromecenalgu popular na rede al traviés de la plataforma dixital Verkami. La previsión ye qu'esti xuegu tea a disposición del públicu pa ochobre o payares.