Fernández Muñiz alvierte que la situación pol coronavirus empeorará

Asturies cuenta con 28,4 casos de COVID-19 por cada 100.000 habitantes, lo que la coloca como una de les comunidaes autonómes con menos incidencia del coronavirus SARS-CoV-2. Sicasí, el conseyeru de Salú, Pablo Ignacio Fernández Muñiz, alvierte de que la situación empeorará nes xornaes próximes.

“Nun hai qu’engañase. Nós vamos un poco adulces, pero la incidencia siguirá aumentando nes feches próximes. Ye lo previsto y lo que llevamos too esti tiempu ye preparándonos pa ello”, aseguró na rueda de prensa telemática qu’ufrió de manera telemática tres el Conseyu de Gobiernu de güei, tamién al traviés de les nueves teunoloxíes. Nella dio los datos d’otres autonomíes, como La Rioja, con 132 cada 100.000 habitantes; Euskadi, con 44; Navarra, con 59; o la Comunidad de Madrid, con 86, cifres munches más altes que n’Asturies, onde la mortalidá tamién ye bien baxa, un 0,34 por cientu cuando la media estatal ye del 4,3 por cientu.

Sobre los picos de la epidemia n’Asturies, apuntó que “nel escenariu más favoratible entovía nos quedaría de pandemia aproximadamente un mes o mes y pico, y nel escenariu más desfavoratible ta falándose de qu’esto pudiera prolongase hasta los cinco meses”, pa recordar darréu que l’oxetivu más afayadizu taría en consiguir que “l’escenariu s’allargara nel tiempu, pero que la curva d’incidencia fora aumentando d’una manera non mui acelerada”. Esto ye, “ralentizar la entrada del virus y el so efeuto na sociedá”.

Darréu apuntó que nun hai saturación del sistema sanitariu asturianu anguaño y confirmó que les persones que tán nestos momentos na UCI nenguna tien menos de 55 años. “Esta situación ye y será lo más paecío a un escenariu bélicu que vivimos y viviremos, y esta batalla vamos ganala si tamos xuníos”, finó’l conseyeru depués d’apuntar que los profesionales sanitarios “llevamos tiempo preparándonos pa esta situación y tamos preparaos pa ello”.

Semeya obra d'Armando Álvarez.